راسک ءَ گوں ھَپَگ کنگئے ٹپّاں کُشگ بوتگیں بلوچئے پجّار زانگ بوتگ

رَسانک نیوز/ شمبے 27 تیر ماہ 1405، پد چہ اشیا کہ 26 تیر ماہ ءَ بلوچییے بے ساھیں جون کہ ھپگ کنگئے رَد ءُ نشاں آییئے گردن ءَ بوتگ ءُ چہ راسکئے پارود دمگئے درمانجاھئے دیما، جهمنندان ءَ شوہاز کرتگ، پجّاہ آرگ بوتگ.

رَسانک ءَ اے بلوچئے پجّار «سلمان بلوچ»، ابدلهمید ئے چُک، بُندر ءَ روچ درآتکیں بلوچستانئے تربت شهر ءَ مند دمگئے نندوک زانتگ.

رَسانک ءِ ھال سرکنوکانی رِد ءَ، اے بلوچیں جهمنند پہ راسکی مردمیا ڈریورییے کارا بوتگ ءُ ٹیلی کَشّتگ۔ مردمی ءَ آیی آوار جتگ ءُ چیریں جاگهی بُرتگ۔ رَند اشیا کہ سلمان ءَ لٹ ءُ شاپ کرتگ، آزار داتگ ءُ ماں سرا زوریں ٹُکِّش جتگ، گوں گُٹّ ئے دارگ، ھَپَگ کنگ ءُ کُشگ ءَ رَند آییئے بے ساھیں جون پارود ئے درمانجاھئے دیم ءَ یلہ دیئگ بوتگ.

گوَشنت سربوتگیں ھالانی رِد ءَ، اے نامردیں کاروایی ئے کنوک کہ پہ چُنت لیتر ٹیل ءَ اے کاری کرتگ، چہ دمگ ءَ در شُتگ ءَ پَراری اِنت.

ھال سرکنوکان ءَ پیسرترا گوَشتگ بے ساھیں جونئے شوہاز کنگ ءَ رَند، جهمنندان ءَ سرھال زمّهواریں کار مسترانا سرکرتگ۔ پارود ئے شهربند اے لاش ءَ پہ زلوریں پٹّ ءُ چار ءُ پجّار ئے درا بوھگ ءَ پارود ئے کانونی ڈاکٹرانی دست ءَ داتگ. بے ساھیں جونئے دست کَپَگئے وھدا، ھچ پئیمیں پجّار ئے کاگد ءُ سَبوت آییا گون نہ بوتگ ءُ ایوکا چُنت پنجاہ ھزاری نوٹ ءُ بانکی ھسابئے دپترچهی چہ آییئے کیسّگاں دست کپتگ.