تپتان ءَ امنیتی ٹولییے اُرش ءَ کُشگ بوتگیں دو بلوچئے لاش 12 روچ ءَ رَند، وارسان ءَ دیئگ بوتگ

رَسانک نیوز/ سئے شمبے 23 تیر ماہ 1405، پنچ شمبے 11 تیر ماہ ءَ تپتان ءَ کهنوک دمگئے نزّیک ءَ امنیتی ٹولییے اُرش ءُ تیرگواری ءَ کُشگ بوتگیں دو بلوچئے لاش 12 روچ ءَ رَند وارسان ءَ دیئگ بوتگ.

اے دو بلوچئے پجّار «اکبال ریگی»، کِساس 27 سالگ، اھمد ئے چُک، آروس کرتگ، «بلال راستا روش (ھاشمزھی)»، کِساس 27 سالگ، ابداللّہ ئے چُک، آروس کرتگ، تپتان ئے بیدک دمگئے نندوک زانگ بوتگ.

پیشترا رَسانک ءَ ھال سرکرتگ کہ اکبال گاڑیانی سوداگری ءَ دلگوش بوتگ ءُ پیسریگیں بلوچیں سیاسی بندیگئے برات اِنت۔ بلال ھم نشهئے یلہ کنگئے جاھا کار ءَ بوتگ ءُ چہ پیسریگیں سیاسی بندیگاں زانگ بیت، کہ اے اُرش ءُ تیرگواری ءَ تیرِش وارتگ ءُ ساھش داتگ۔ اے ھون ءُ کوشئے دوراں «میسم ریگی»، کِساس 18 سالگ، اھمد ئے چُک ءُ اکبال ریگی ئے برات کہ ھِشت جَنَگئے کار ءَ دلگوش بوتگ، نزامیان ءَ دزگیر کرتگ.

اے کارواییا، دھاں امنیتی ءُ نزامی گاڑیان ءَ تپتان ءَ کهنوک دمگئے راھش بستگ اَنت ءُ اے بلوچانی پژو پارس گاڑییے سرا بید چہ پیسریگیں جار ءُ دلگوش دیئگ ءَ تیرگواریش کرتگ۔ تیرگواریئے نتیجگ ءَ اکبال ءُ بلال ءَ تیر وارتگ ءُ ساھِش داتگ۔ ھال سرکنوکان ءَ گوَشتگ تیرگواری ئے وھدا اے بلوچان ءَ ھچ پئیمیں سلاہ بندیں جُهد اِش نہ کرتگ.

ھال سرکنوکان ءَ گوَشتگ تیرگواری ءَ پد امنیتی ٹولی اکبال ئے پت ءُ پیروکی لوگئے سرا اُرش ءُ لوگئے پِت (اھمد ریگی) ءَ لٹ ءُ شاپ کرتگ۔ لوگئے پٹ ءُ پول ءَ رَند، لوگئے مردمانی موبایل گوں وت ءَ بُرتگ اَنت.

گوَشگ لوٹیت اکبال ءُ میسم «مهمداُمر ریگی»، پیسریگیں بلوچیں سیاسی بندیگئے برات اَنت۔ سیستان ءُ بلوچستان پلیسئے ھال سرکنوکیں ادارہ ءَ گوَشتگ: کُشگ بوتگیں دویں مردماں تپتانئے نوک آباد دمگ ءَ پلیس کارمندانی کُشگ ءَ ھور بوتگ اَنت.