پهرہ ءَ نزامی پوشیں سلاہ بندین ءُ بے پجّاریں مردمانی لوگییے سرا اُرش ءَ بلوچیں نوک ورنا ئے ھوری ءَ سئے مردم کُشگ ءُ ٹپّیگ بوتگ

رَسانک نیوز/ زی 22 تیر ماہ 1405، پهرہ ئے شهر دراج دمگ ءَ پنچ سلاہ بندین ءُ بے پجّاریں مردمانی کہ چُنت ءَ پلنگی نزامی پُچ گوَرا بوتگ، پُرّیگیں لوگییے سرا اُرش کرتگ۔ اے اُرش ءَ بلوچیا ساہ داتگ ءُ یک نوک ورنا ییے ھوری ءَ دو بلوچ ٹپّیگ بوتگ.

رَسانک ءَ کُشگ بوتگیں بلوچئے پجّار «مهمد نسیم چترامبرین»، کِساس 45 سالگ، امین ئے چُک، آروس کرتگ ءُ پنچ زھگئے پت، پهرہ ئے شهر دراج دمگئے نندوک ءُ ٹپّیگ بوتگیں دو بلوچئے پجّار «پدرام چترامبرین»، کِساس 15 سالگ، مهمد نسیم ئے چُک ءُ «اَلی ھاشمی»، اُرپ اَلی ساپکار زانتگ.

رَسانک ءِ ھال سرکنوکانی رِد ءَ، اے تیرگواری ءَ لوگ ءَ نندوک مهمد نسیم ءُ یک دگہ بلوچی ءَ چُنت تیر وارتگ ءُ سکّ ءَ ٹپّیگ بوتگ اَنت۔ پهرہ ئے ھاتم الانبیاء نادراہجاہ ءَ سرکنگ ءَ رَند مهمد نسیم چہ بازیں ٹپّان ءَ ساہ داتگ۔ پدرام ءَ ماں پادا تیر وارتگ ءُ اَلی ئے ھوری ءَ اے وھدا نادراہجاہ ءِ I.C.U واڈ ءَ بستری اِنت.

داں انگتا سلاہ بندیں مردمانی پجّار ءُ آیانی سئوب چہ اے کارا زانگ نہ بوتگ.