تپتان ءَ سوبہ ئے امنیتی ادارھانی ھوریں کاروایی ءَ کُشگ بوتگیں دویں بلوچانی پجّار زانگ بوتگ/ یک نوک ورنایی دزگیر بوتگ

رَسانک نیوز/ مروچی جمے 12 تیر ماہ 1405، کُشگ بوتگیں دویں بلوچانی پجّار کہ زی 11 تیر ماہ ءَ امنیتی ادارھانی تپتان ئے کهنوک دمگئے سرا اُرش ءُ تیرگواری ءَ ساھش داتگ زانگ بوتگ۔ ھمیں وڑا امنیتی ٹولییا یک نوک ورنائیں بلوچی کہ اے مردمانی نزّیکیں سیادی بوتگ دزگیر کرتگ.

ساہ داتگیں دویں بلوچانی پجّار «اکبال ریگی»، کِساس 27 سالگ، اھمد ئے چُک، آروس کرتگ ءُ «بلال راستا روش (ھاشمزھی)»، کِساس 27 سالگ، ابداللہ ئے چُک، آروس کرتگ بُندر ءَ تپتان ئے بیدک دمگئے نندوک زانگ بوتگ۔ دزگیر بوتگیں بلوچئے پجّار «میسم ریگی»، کِساس 18 سالگ، اھمد ئے چُک، اکبال ئے برات ءُ پہ ھِشتئے جَنَگئے کارا دلگوش بوتگ.

اے ھالئے رِد ءَ، اکبال گاڑیانی سوداگری ءَ دلگوش ءُ یک پیشگیں سیاسی بندیگئے برات بوتگ ءُ بلال ھم ماں نشہ ئے یلہ کنگئے کیمپ ءَ کار ءَ بوتگ ءُ آییئے جِند ھم چہ پیشگیں سیاسی بندیگاں بوتگ، کہ اے اُرش ءَ تیری وارتگ ءُ ساھی داتگ.

ماں اے کاروایی ءَ امنیتی ادارھانی دھاں گاڑی کهنوک دمگئے راھش بستگ ءُ بلال ءُ اکبال ئے پژو پارس گاڑییے سرا بید چہ پیسریگیں دلگوش دئیگ ءَ تیرگواری کرتگ۔ اے تیرگواری ءَ آیان ءَ تیر وارتگ ءُ ساہ داتگ۔ ھال سرکنوکان ءَ گوَشتگ ویلئے وھدا اے بلوچان ءَ ھچ پئیمیں سلاہ بندیں گامگیجی نہ کرتگ.

ھال سرکنوکان ءَ گوَشتگ امنیتی ٹولییا تیرگواری ءَ رَند اکبالئے لوگئے سرا ماں تپتان ئے گروک دمگ ءَ اُرش کرتگ ءُ «اھمد ریگی»، ھاندانئے پت ءَ لٹ ءُ شاپ داتگ۔ لوگ ءَ پٹ ءُ پولِش کرتگ ءُ لوگئے مردمانی موبایلش بُرتگ اَنت.

اُرش ئے دیمروی ءَ، امنیتی ٹولی ءَ میسم ئے سرا تیرگواری کرتگ ءُ بید چہ تیر ئے ورگ ءَ آییا دزگیرش کرتگ ءُ چیریں جاگهی بُرتگ، تاں انگتا آییئے ھالے سرپد ئے دست نہ کپتگ.

گوَشگ لوٹیت اکبال ءُ میسم «مهمد اُمر ریگی»، پیشگیں سیاسی بندیگئے برات اَنت۔سیستان ءُ بلوچستان ئے پلیسئے ھال سرکنوکیں ادارہ ءَ گوَشتگ، کُشگ بوتگیں اے دویں بلوچ، تپتان ئے نوک آباد ءَ پہ پُلیسانی کُشگ ءَ چہ بُنی مردماں بوتگ اَنت.