رَسانک نیوز/ یکشمبے 31 ھُرداد ماہ 1405، زابلئے بندیگجاہ ءَ بلوچیں بندیگی کہ ماں سال 1377 ءَ پہ مواد ئے چِست ءُ ائیر ءَ دزگیر کنگ بوتگ، 28 سال بندیگییے سگّگ ءَ رَند پاھو دئیگ بوتگ.
اے بلوچیں بندیگ ئے پجّار «ھُسین یوسپزھی»، ملنگ شیر ئے چُک، بُندر ءَ نهبندان ءِ تبسین بالا ئے نندوک زانگ بوتگ.
اسناد کانال ءِ ھالانی رِد ءَ، یوسپزھی 28 سال پیسر، ماں سال 1377 ءَ تربت ھیدریہ ءَ پہ مواد ئے الزاما دزگیر ءُ پہ ھمے شهر ئے بندیگجاہ ءَ شور دئیگ بوتگ۔ گوں پرمندھئے دیمروی ءُ زمانت ئے سرا پہ بیرجند ئے بندیگجاہ ءَ شور دئیگ بوتگ ءُ اُداں راہ پچیں بندیگی بوتگ۔ یوسپزھی نزّیک 5 سال پیسر ماں زابل ءَ گوں 50 گرم شیشگ ءَ دزگیر ءُ پہ اے شهر ئے تاکزی بندیگجاہ ءَ شور دئیگ بوتگ۔ ماں ائولی پیشی پرمندھئے کازی ءَ پہ ھسین تانکہ ابد بندیگ بوھگئے ھُکم بُرّتگ، بلے پد چہ گیشتریں پٹ ءُ پول ءَ آییا پاھو ئے ھکمی داتگ.
گوَشنت کہ پرمندھئے کازی ءَ گوں ھسین ءَ گوَشتگی کہ باید اَت ماں پیسریگیں پرمندہ ءَ ترا پاھو ئے ھُکمش بداتین۔ بندیگجاہ ئے زمّهواران ءَ آییئے لوگئے مردم پہ گُڑسریں دیدار ءَ لوٹتگ ءُ اے دیدار پیسر چہ ھُکمئے سرا کاروایی ءَ کنگ بوتگ.
گوَشگ لوٹیت یوسپزھی ئے برات زاتک گوں «ھمید یوسپزھی» ئے پجّار ءُ مهمد نبی ئے چُک گوستگیں ماھاں ماں شیراز ئے آدل آباد بندیگجاہ ءَ پاھو دئیگ بوتگ.
Be the first to comment