چهبار ءَ سلاہ بندین ءُ بے پجّاریں مردمانی تیرگواری ءَ بلوچی کُشگ بوتگ

رَسانک نیوز/ جمے روچ 15 ھُرداد ماہ 1405، چهبار ءَ رمین دمگ ءَ بلوچی یک ساھت ءَ پد چہ اشیا کہ لوگ ءَ ڈنّ بوتگ «بوم گردی پایندہ» ئے دیما سلاہ بندین ءُ بے پجّاریں مردمانی تیر ئے دپ ءَ کپتگ ءُ ماں سینگ ءَ تیری وارتگ۔ اے بلوچ ءَ جاہ ءَ ساہ داتگ.

رَسانک ءَ اے بلوچئے پجّار «سهیل پکئیران»، ھدابکش ئے چُک، چهبار ءِ رمین دمگئے نندوکیں مردمی زانتگ.

رَسانک ءِ ھال سرکنوکانی رِد ءَ، سهیل روچئے ساھت 11 ئے وھدا گوں وتی ھاندانئے مردمی جُڑتگ ءُ گوشتگی چہ سلاہ بندین ءُ بے پجّاریں مردمانی تیرگواری ءَ ٹپّیگ بوتگ۔ آییئے سیاد ءُ نزّیکاں اشتاپ ءَ جاہ ءَ سربوتگ اَنت ءُ آییا امام اَلی نادراہجاہ ءَ سرِش کرتگ۔ بلے ڈاکٹران ءَ گوَشتگ آییا چہ بازیں ٹپّ ءُ ھون ئے ریچگ ءَ ساہ داتگ.

رَسانک ءِ ھال سرکنوکان ءَ گوَشتگ: اے بلوچ چہ رمین ئے دھیاری ئے کارمنداں بوتگ ءُ آییا ھچ پئیمیں اَڑ ءُ جیڑے گوں کسی ءَ نہ بوتگ. داں انگتا سلاہ بندین ءُ بے پجّاریں مردمانی سئوب ءُ پجّار زانگ نہ بوتگ۔ بلے اے بُن گپّ ءِ سرا ھم دمگئے کلانتری ءُ ھم ماں جُست ءُ پُرس کنوکیں ادارہ ءَ شکایست جما بوتگ ءُ اے بابت ءَ پٹ ءُ پول بُنگیج بوتگ.