نیمروز ئے سیمسراں چاروگیں نزامی ٹولییے تیرگواری ءَ بلوچیں ٹیلکشّی کُشگ ءُ آییئے برات ٹپّیگ بوتگ

رَسانک نیوز/ دوشمبے روچ 28 اردیبهشت ماہ 1405، نیمروز ئے سیمسراں بلوچیں ٹیلکشّی کہ پہ بڈّ ءَ ٹیلی کَشّتگ چہ سیمسراں چاروگیں نزامی ٹولییے تَچکیں تیرگواری ءَ ساھی داتگ۔ ھمیں وڑا آییئے برات ھم دو ھپتگ پیسرا چہ ھمیں ٹولییے تیرگواری ءَ ٹپّیگ بوتگ.

کُشگ بوتگیں بلوچیں ٹیلکشّئے پجّار «یاسر ازبکزھی»، کِساس 19 سالگ، ھبیب ئے چُک، بُندر ءَ نیمروز ئے سیمسرانی نندوکیں مردمی زانگ بوتگ. داں انگتا آییئے برات ئے پجّار زانگ نہ بوتگ.

اے ھالئے رِد ءَ، سیمسراں چاروگیں نزامی ٹولی ءَ بے جار ءُ دلگوش دئیگ ءَ یاسر ئے سرا تَچکیں تیرگواری کرتگ کہ آییا ماں دیم ءُ گوش بُنا تیر وارتگ ءُ ساھی داتگ.

گوَشنت کہ یاسر چہ ھماں ٹیلکشّاں بوتگ کہ پہ وتی لوگئے مردمانی ھرجییے در آرگ ءَ ماں ھُردیں گیلناں پہ بڈّ ءَ ٹیلی کَشّتگ۔ ویل ءَ پد آییئے بے ساھیں جون لوگئے مردمانی دست ءَ دئیگ بوتگ ءُ ماں پیدا بوھگئے جاہ ءَ ھاکاں ایر دئیگ بوتگ۔ یاسر ئے کستریں برات ھم نزّیک دو ھپتگ پیسرا چہ ھمیں ٹولییے تیرگواری ءَ ماں دست ءَ تیر وارتگ ءُ ٹپّیگ بوتگ.