مگس ءَ امنیتی ٹولی ءَ دو بلوچیں براتانی لوگئے سرا اُرش ءَ پد، آیاں پہ ھژم ءُ زورا دزگیر کنگ بوتگ اَنت

رَسانک نیوز/ پنچشمبے 7 ھُرداد ماہ 1405 ءِ بیگاہ ءَ، مگس ئے سیاہ تُپاک دمگ ءَ دو بلوچیں برات پد چہ اشیا کہ امنیتی ٹولییا آیانی ھاندانی لوگئے سرا اُرش کرتگ، پہ زور ءُ ھژما دزگیر کنگ بوتگ اَنت۔ اے دزگیر کنگ گوں زور ئے کارمرز کنگ ءُ لٹ ءُ شاپ ءَ ھوار بوتگ.

دویں بلوچیں براتانی پجّار «مهسن دھانی»، 32 سالگ، آروس کرتگ ءُ دو زھگئے پت۔ «اھسان دھانی»، 25 سالگ، آروس کرتگ ءُ دو زھگئے پت، بُندر ءَ مگس ئے سیاہ تپاک دمگئے نندوکیں مردم زانگ بوتگ اَنت.

اے ھالئے رِد ءَ، مگس ئے چیریں ادارھئے سادہ پوشیں ٹولی اے دویں براتانی لوگئے سرا اُرش کرتگ ءُ در چہ سرکار ئے ھُکم ءُ بید چہ آیانی کسئور ءُ مئیار ءُ دزگیر کنگئے سئوب ئے گوَشگ ءَ آیان ءَ لٹ ءُ شاپ کرتگ ءُ چیریں جاگھی بُرتگ۔ امنیتی کارمندان ءَ آیانی سرا بستگیں تهمت ءِ بارئوا ءُ اشی کہ کجا آیان ءَ برنت ھچ روژنیں گپّی نہ جتگ.

گوَشنت کہ اھسان ءُ مهسن ئے ھاندان ءُ نزّیکان ءَ پد چہ آیانی دزگیر کنگ ءَ پہ ھالے سرپدئے دست کپگ ءَ ماں امنیتی ادارھان ءَ باز رَندگیری کرتگ بلے داں انگت ءَ آیان ءَ ھچ روژنیں پسّویی دئیگ نہ بوتگ۔ دویں براتانی بے ھالے سرپدئے برجاہ بوھگ ءَ ھاندان ءُ لوگئے مردمانی دل پریشانی گیش کرتگ.