رَسانک نیوز/ چارشمبے روچ 16 اردیبهشت ماہ 1405، بلوچ جهمنندے کہ ماں تاریک 28 آبان ماہ 1404 ءَ دُزاپ ءِ چیریں ادارھئے سادہ پوشیں ٹولی ءَ آیانی لوگئے سرا اُرش ءَ پد گوں مستریں برات ءَ ھور دزگیر کرتگ ءُ وتی دارگ جاہ ءَ بُرتگ۔ آییئے آمیدگِس ئے دیوان ھماں وھدا برجم دارگ بوتگ کہ امنیتی بُهتان ئے دیمپان اِنت ءُ آییئے برات دزگیر بوھگئے دو ماہ ءَ پد، چہ چیریں ادارھئے دارگ جاہ ءَ آجو بوتگ.
رَسانک ءَ اے بلوچئے پجّار «میساک رھمتزادہ (ھارکوھی)»،18 سالگ، ائیدمهمد اُرپ (جان دوست) ئے چُک، آییئے برات «مهدی رھمتزادہ (ھارکوھی)»، 21 سالگ، ھر دو دُزاپ ئے نندوک زانتگ.
رَسانک ءِ ھال سرکنوکانی رِد ءَ، میساک ئے پرمندہ ئے دیمروییے دیوان ماں دُزاپ ءِ انکلاب آمیدگِس ئے دومی بهرا برجم دارگ بوتگ۔ اِنساپ ادارہ ءَ آییئے کسور ءُ مئیار «سرکار ئے ھِلاپیں گل ءُ تنزیمانی بهر بوھگ ءُ گوں آیاں ھمکاری» گوَشتگ. داں انگت ءَ دئیگ بوتگیں ھُکمئے بارئوا ھالی دست نہ کپتگ.
پیشترا رَسانک ئے ھال سرکنوکان ءَ گوَشتگ: دُزاپ ءِ چیریں ادارھئے سادہ پوشیں ٹولی بید چہ سرکار ئے ھُکم ءُ دزگیر کنگئے سئوب ئے گوَشگ ءَ اے دویں براتانی لوگئے سرا ماں انکلاب روڈ ءَ اُرش کرتگ ءُ آیاں پہ دارگ جاہ ءَ شور داتگ.
ھال سرکنوکان ءَ گوَشتگ: مهدی شمبے روچ 8 آزر ماہ دزگیر بوھگئے دہ روچ ءَ پد، چہ چیریں ادارھئے دارگ جاہ ءَ پہ دُزاپ ءِ بندیگجاہ ءَ شور دئیگ بوتگ ءُ نزّیک دو ماہ ماں اے بندیگجاہ ئے (سیاسی۔امنیتی) 9 نمبر واڈ ءَ بندیگ بوتگ.
Be the first to comment