ھیرمند ءَ بلوچی جنیں آدمی گوں دو ھُردیں چُک ءُ یک نوک ورنا ئے ھوری ءَ دزگیر کنگ بوتگ، اسپیت ریشان ءَ اے مردمانی دزگیر کنگئے ھِلاپ زھرشانی کرتگ

رَسانک نیوز/ جمے روچ 1 ھُرداد ماہ 1405، تاریک دوشمبے روچ 28 اردیبهشت ماہ 1405، ھیرمند ئے سارانی دمگ ءَ امنیتی ءُ نزامی ٹولی ءَ بلوچ ھاندانییے سیادان ئے لوگئے سرا اُرش ءَ پد بید چہ گناہ ءُ مئیار ئے گوَشگ ءَ یک بلوچیں جنیں آدمی ءَ گوں دو ھُردیں چُک ءُ یک ورناییے ھوری ءَ دزگیر ءُ چیریں جاگهی بُرتگ۔ ھمیں وڑا دمگئے کماشیں مردمی کہ جاھا ساڑی بوتگ ءُ اے جنیں آدم ئے دزگیر کنگئے ھِلاپ ءَ زھرشانی کرتگ دزگیر کنگ بوتگ.

اے بلوچی جنیں آدم ئے پجّار «کلسوم رکشانی»، 23 سالگ، اَوَز ئے چُک، آییئے دو ھردیں چُک «سارا رکشانی»، کِساس یک و نیم سالگ، «بی بی آیشہ رکشانی»، 4 سالگ، بُندر ءَ دُزاپ ئے شیرآباد دمگئے نندوکیں مردم زانگ بوتگ۔ بی بی آیشہ چہ دویں پاداں شَلّ اِنت ءُ سُر اِت نکنت۔ ھمیں وڑا کلسوم ئے نوک ورنائیں سیادے کہ آییئے پجّار «اسهاک رکشانی»، کِساس 16 سالگ، بسم اللہ ئے چُک، گوں آیاں ھور دزگیر کنگ بوتگ.

ھالئے رِد ءَ، اے ھاندان سارانی دمگ ءَ وتی سیاد یئے لوگ ءَ بوتگ اَنت کہ امنیتی ٹولی ءَ آیانی سرا اُرش کرتگ ءُ بید چہ کسور ءُ مئیار ءَ پہ ھژم ءُ تُرندی ءَ کلسوم، دو ھُردیں چُک ءُ آییئے یک نوک ورنائیں سیادی ءَ دزگیر ءُ آوار جتگ.

گوَشنت کہ دزگیر کنگئے وھدا، دمگئے اسپیت ریشیں مردمی کہ آییئے نام «ازیز اللہ ماککی (رکشانی)»، ھکیم ئے چُک، کِساس 52 سالگ، بُندر ءَ سارانی دمگئے نندوک کہ ھماں لوگ ءَ بوتگ ءُ جنیں آدم ءُ چُکّانی دزگیر کنگئے ھِلاپ ءَ زھرشانی کرتگ ءُ چہ نزامیان ءَ لوٹتگی کہ اے ھاندانئے دزگیر کنگئے سئوب ءَ پہ روژن ءَ بہ گوَشنت ءُ کم چہ کمترا چُکّان ءُ نوک ورنایا یلہ بدئینت یانکہ آیانی دزگیر کنگئے سئوب ءَ بگوَشنت، نزامی ٹولی ءَ پسّو دئیگ ئے بدلا کماشیں مرد ءَ بیهارِش کرتگ ءُ دزگیر کنگ ءَ پد چیریں جاگهی بُرتگ.

دزگیر کنگئے سئے روچ ءَ پد، اے مردمانی سیاد ءُ ھاندان ئے مردمان ءَ آیانی ھچ پیمیں ھالئے سرپدئے دست نہ کپتگ ءُ اے گپ ءَ دو ھُردیں چُک ءُ ھاسکار شَلّیں چُکّئے بارئوا دل پریشانی گیش کرتگ.

داں اے وھدا، زمّهواریں ادارھان ءَ آیانی دزگیر کنگئے پُژدر ءُ دارگ ئے جاگہ ءُ پرمندہ ئے جاور ئے سرا ھچ گپّی نہ جتگ.