پهرہ ءَ چہ امنیتی ٹولیئے تیرگواری ءُ گاڑی ئے بُن گِرگ ءَ چار بلوچ میدانی پاھو دئیگ بوتگ

رَسانک نیوز/ دوشمبے 21 اردیبهشت ماہ 1405، پهرہ ئے سرکهوران دمگ ءَ اُد ئے چیریں ادارھئے ٹولی ءَ بید چہ پیشیں اُوشت ئے دئیگ ءُ دلگوش بئیگ ئے جارا گاڑییے کہ چار بلوچ سوار بوتگ، گوں تَچکیں تیراں بستگ، اے تیرگواری ءَ ھر چارا تیر وارتگ ءُ ساہ داتگ۔ ھمیں وڑا اے تیرگواری ءَ آیانی گاڑی بُن گپتگ ءُ ندر بوتگیں مردمانی بے ساھیں جون ماں آس ءَ سوھتگ اَنت.

رَسانک ءَ کُشگ بوتگیں چاریں بلوچانی پجّار «ابدلهلیم ھملی»، 50 سالگ، ابدلکریم ئے چُک، «ناسر ھملی (جمالزھی)»،43 سالگ، «ماجد ھملی (جمالزھی)»،41 سالگ، ھر دویں برات ءُ ابدلرھمن ئے چُک ءُ «منسور جمالی»، 30 سالگ، ابدلهالک ئے چُک، سجّهیناں آروس کرتگین ءُ زھگانی پت ءُ بُندر ءَ سرباز ئے آبچکی دمگئے نندوک زانتگ.

رَسانک ءِ ھال سرکنوکانی رِد ءَ، زی ساھت 13 ئے وھدا، پهرہ ئے چیریں ادارہ ئے کارمند کہ پژو پارس گاڑی ئے نندوک بوتگ اَنت، بید چہ پیشیں جار ءُ دلگوش دئیگ ءَ اے بلوچانی پژو 405 گاڑی ئے سرا تچکیں رگبار بستگ۔ اے تیرگواری ءَ پژو 405 گاڑی ئے چاریں نندوکان ءَ تیر وارتگ ءُ جاہ ءَ ساہ داتگ.

ھال سرکنوکان ءَ گوشتگ: تیرگواری اینچک زور دار بوتگ کہ گاڑی اُوشتگ ءَ پد بُن گپتگ ءُ ندر بوتگیں مردمانی بے ساھیں جون ماں آس ءَ سوھتگ اَنت تان اِداں کہ دو بے ساھیں جون ئے پجّاہ آرگ سک بوتگ۔ چمّ وت دیستگیں مردمان ءَ گوشتگ بلوچانی گاڑی ئے اُوشتگ ءَ پد، اُرش کنوکیں ٹولی چہ وتی گاڑی ءَ ایر کپتگ اَنت ءُ پہ وتی دلجم کنگ ءَ کہ پژو 405 گاڑی ئے تمانیں نندوکاں کُشگ بوتگ اَنت پدا آیانی سرا تیرگواریش کرتگ.

تان انگت ءَ جمهوری اسلامی ئے زمّهوار ءُ امنیتی سروکان ءَ اے تیرگواری ئے پُژدر ءُ ندر بوتگیں مردمانی پجّار ءُ مئیار ئے بارئوا ھچ وڑیں درشانی نہ داتگ.