شستون ءَ بلوچیں جنیں آدمی چہ مرد ئے لٹّ ءُ کُٹ ءُ آس ءَ مان دارگ ءَ کُشگ بوتگ/ جرم دار دزگیر کنگ بوتگ

رَسانک نیوز/ شمبے 12 اردیبهشت ماہ 1405، شستون ءَ بلوچیں جنیں آدمی کہ ماں تاریک پنچشمبے روچ 10 اردیبهشت ماہ ءَ ماں وتی زاتی لوگا کہ مرد ئے دست ءَ لٹ ءُ کُٹ ءَ پد آس ءَ مان دارگ بوتگ دو روچ ءَ پد چہ ٹپّانی باز بوھگ ءَ ماں نادراہجاہ ءَ ساھی داتگ.

رَسانک ءَ اے بلوچیں جنیں آدمئے پجّار «مهسا براھویی»، 33 سالگ، جلال الدین ئے چُک، بُندر ءَ شستون ئے بم پشت زِلّهئے کشتگان دمگئے نندوک ءُ شستون ئے جهمنند زانتگ.

رَسانک ئے ھال سرکنوکانی رِد ءَ، 10 اردیبهشت ماہ ءَ شپ ئے ساھت 9 ئے وھدا، مهسا ئے مرد ءَ نشہ کنگ ءَ پد آییا لٹّ ءُ کُٹّی کرتگ ءُ لوٹتگی مهسا ئے گُٹّ ءَ بداریت ءُ بہ کُشیت، بلے مهسا آییئے دیم داشتگ، دیمترا مرد ءَ آییئے سرا بنزین ریهتگ ءُ بُن داتگ.

رَسانک ءِ ھال سرکنوکان ءَ گوشتگ: ھمسایگان ءَ مهسا ئے کوکار ءُ تئوار ئے اِشکُنگ ءَ پد چہ دیوال ئے سرا لوگا تها بوتگ اَنت۔ بلے مهسا یک ساھت ءَ دیر نادراہجاہ ءَ سر کنگ بوتگ۔ گوں اشیا کہ ڈاکٹران ءَ پہ آییئے دراہ کنگ ءُ رَکّینگ ءَ جُهد کرتگ بلے چہ سوچکئے ٹپّانی باز بوھگ ءَ مهسایا دو روچ ءَ پد ماں نادراہجاہ ءَ ساہ داتگ.

ھمیں پئیما رَسانک ءِ ھال سرکنوکان ءَ گوشتگ 12 اردیبهشت ماہ ءَ نزامی ٹولی ءَ مهسا ئے مرد گوں ھاندانئے نام «دھواری» ءَ دزگیر کرتگ ءُ دارگ جاھا برتگ.