سرباز ءَ بلوچییے دیم دارگ ءُ بے ھال سرپد بئیگ ءَ دہ روچ اِنترَسانک نیوز/ جمے روچ 21 پروردین ماہ 1405 ءَ، مولوی پاروک ھمّلی (شادمان‌پور) کہ ایران آمریکا۔ اسراییل ئے جنگئے دوران ماں تاریک 12 پروردین ماہ امنیتی ٹولی چہ سرباز ءَ دزگیر ءُ چیریں جاگھی ءَ برتگ، ویلئے دہ روچا پد داں انگت ءَ آییئے ھالئے سرپدئے نیست اِنت.

اے بلوچ ھماں وھدا کہ گوں پٹ پٹی ءَ وتی دمگ ءَ پد ترّگ ءَ بوتگ، نسکند ءِ نزّیک ءَ امنیتی ٹولی ءَ آییئے دیم داشتگ ءُ دزگیر کرتگ۔ پد چہ اِشیا امنیتی کارمنداں گوں دھا نزامی ءُ زاتی گاڑی ءَ آبچگی دمگئے سرا اُرش کرتگ۔ اے اُرش ءَ نزامی کارندگان ءَ دمگئے چاگرد داشتگ ءُ دمگئے لوگان ءَ پٹ ءُ پولِش کرتگ۔ اے اُرش ءَ کم چہ کمترا 4 مردم پہ بیست ءُ چار ساھت ءَ دزگیر کنگ بوتگ.

اے ھالئے رِد ءَ، اُرش ءِ وھدا دمگئے موبایلانی آنتن ءُ آ دگہ جُڑگئے راھاں بند کنگ بوتگ اَنت۔ دمگ ءَ تھا بئیگ ءُ در آیگئے راھان گوں تُرندیں ایمنی ئے جاوراں بند کنگ بوتگ اَنت۔ ھمے وھدا بازیں جُهدے پہ دمگئے نندوکیں جنینان ءُ جنکانی منّینگ پہ اِشیا کہ دمگ ءَ سلاھبندیں گلاں گوں جُڑتگیں مردمان ءَ داشتگ کنگ بوتگ۔ ھمے وڑا امنیتی کارندگانی ترندیں پیش آتک ءُ جھمنندان ءُ چکانی لٹ ءُ شاپئے ھم ھال سر بوتگ.

گوشنت اے اُرش پد چہ سلاھبندیں ٹکّر ءَ کہ تاریک 11 پروردین 1405 ءَ ماں سرباز ءَ پیش آتکگ، کنگ بوتگ۔ اے ٹکّر ءَ دو نزامی کارمند کُشگ بوتگ.