دشتیاری ءَ سئے بلوچ گوں نزامی ءُ امنیتی ٹولی ئے رگبار ءُ میدانی پاھو ءَ کُشگ بوتگ اَنت

رَسانک نیوز/ جمے روچ 14 پروردین ماہ 1405 ءَ، دشتیاری ئے سند ھمزہ دمگئے نزّیکا نزامی ءُ امنیتی ٹولی ءَ راہ ءَ روانیں گاڑی ئے سرا تچکین ءُ رگباری تیرگواری کرتگ، اے تیرگواری ءَ سئے بلوچ ءَ تیر وارتگ ءُ وتی جانِش چہ دست داتگ۔ اِشانی میان ءَ یکّیا ھلاسیئے تیر جنگ ءُ میدانی وڑا پاھو دئیگ بوتگ.

اے سئے بلوچئے پجّار «بلال ھوت»، کِساس 24 سالگ، موسائے چُک، بُندر ءَ دشتیاری ئے کچ دمگئے نندوکیں مردم، آدگہ دوئیں بلوچانی پجّار کہ برات بوتگ اَنت «ابوبکر پیراستا»، 27 سالگ ءُ «سنااللہ پیراستا»، 29 سالگ، ھر دو ابداللہ ئے چک ءُ دشتیاری ءَ سمّاچ دمگئے نندوکیں مردم زانگ بوتگ.

ھال وشّ ئے ھالانی رِد ءَ، امنیتی ءُ نزامی ٹولی ءَ وتی راہ ءَ روانیں توتا لندکروز گاڑی ئے سرا بید چہ پیسریں جار ءُ دلگوش دئیگ ءَ تیرگواری کرتگ. اے تیرگواری ءَ ھر سئے بلوچ ءَ تیر وارتگ ءُ ساہ داتگ۔ اے تیرگواری اینچُک زور دار بوتگ کہ گاڑی چہ راہ ءَ ڈنّ شُتگ ءُ لیٹ وارتگ۔ گاڑی ئے نندوکان ءَ ویلئے بُنگیجی دمان ءَ تیرِش وارتگ.

گوَشنت گوں اِشیا کہ پد چہ بُنگیجی تیرگواری ءَ یکّے چہ گاڑی ءِ نندوکیں مردمان انگت زندگ بوتگ کہ امنیتی ءُ نزامی ٹولی ءَ پدا آییئے سرا تیرگواری کرتگ ءُ ھلاسیئے تیرِش جتگ ءُ کُشتگ.

تان اے ساھت ءَ، تیرگواری ئے سئوب ءُ اے بلوچانی کئسور زانگ نہ بوتگ۔ ایران ئے سرکاری زمّهواران ءَ ھم اے بارئوا وتی درشانی نہ داتگ.