رَسانک نیوز/ پنچشمبے 28 اسپند ماہ 1404 ءَ، جمھوری اسلامی ایران ئے چئیریں ادارہ ئے وزارت ءَ یک بلوچیئے کُشگ ءُ 13 دگر ئے ماں چھبار، پہرہ ءُ دُزاپ ءَ دزگیر کنگئے ھال شنگ ءُ داوایی کرتگ آیاں اسراییل ئے جاسوس بوتگ اَنت، کہ ماں امنیتی ءُ نزامی ادارہ آنے ھئوریں کارواییا کُشگ ءُ دزگیر بوتگ اَنت. شنگ بوتگیں ھالا گوشگ بوتگ: «مُلکئے روچ در آتکئے زرباریں دمگاں 13 مردم چہ اسراییل ئے جاسوس ءُ ناشرکاران دزگیر کنگ بوتگ اَنت»۔ ھمے وڑا «نئمت اللہ شہبکش»، نامیں مردمیئے بُنجاہ گوں چئیریں ادارہ، سپاہ ءِ کُدس ءُ پراجا ئے ھئوریں کاروایی ءَ تباہ کنگ بوتگ.
اے ھالئے رِد ءَ، دزگیر بوتگیں مردمان پہ اسراییلا جاسوسی کرتگ ءُ چہ اھمیں جاگھاں اَکس ءُ ویڈیو رکاڈ کرتگ ءُ پہ دُژمنا دیم داتگ۔ آیاں دُژمن ئے پرمانا مھتل بوتگ اَنت کہ ماں بلوچستان ءَ تروریستی کاروایی بکننت۔ ھمے تَچکیا چئیریں ادارہ ءَ داوا کرتگ کہ ماں چھبار، پہرہ ءُ دُزاپ ئے شھراں چہ دزگیر بوتگیں مردمانی بُنجاھا، بازیں سلاہ ءُ جاسوسی ئے ساز ءُ سامان آں ھئور پنچ استار لینک ئے آنتن دست کپتگ. اے کاروایی ءَ نئمت اللہ شہبکش کُشگ ءُ آییئے چار مردمی ٹولی ماں دُزاپ ئے کش ءُ کِرّ ئے کوھاں پجّار ءُ پد گِرگ ءَ رند دزگیر کنگ بوتگ.
جمھوری اسلامی ھماں وھدا اے ھال شنگ کرتگ کہ بلوچیں سماجی ءُ انسانی ھکّ ئے جھدکاران ءَ مدام سرکار ئے اے وڑیں داوا رَد کرتگ اَنت۔ بازیں برا، بلوچانی پہ جاسوسی ءُ تروریستی کارواییانی الزاما دزگیر کنگ، بید چہ سبوت ءُ سند ءَ بوتگ۔ جاور ئے ھمے پئیم برجاہ بوھگ ءُ ھکومت ئے بلوچانی پادلپاش کنگ، سرکار ئے ماں بلوچستان ءَ ایمنی ئے نیمون ءَ زوراکی یے تُرند کنگ ئے سئوب ایران ءُ اسراییل ئے جنگئے دوران ءَ مهلوکئے زھرشانی ئے دیم دارگ ءُ پادلپاش کنگ اِنت.
Be the first to comment