دُزاپ ءَ بلوچیں دینی زانتکاری آوار جنگ بوتگ، آئی ءِ بے ھالے سرپد ئے برجاہ اِنت

رَسانک نیوز/ جمے روچ 1 اسپند ماہ 1404، بلوچیں دینی زانتکاری کہ سئے شمبے 27 بہمن ماہ ءِ بانگواہ ءَ دُزاپ ءِ رجایی شہر روڈ ءَ چہ وتی زاتی لوگئے دیم ءَ سلاہ بندین ءُ پجّار نہ بوتگیں مردمان ءَ آوار جتگ، ویلئے چار روچ ءَ پد داں انگت ءَ آئی ءِ دارگ ئے جاگہ، جِند ئے جاور ءُ آئی ءِ سر نبشت ئے بابت ءَ ھچ پیمیں ھالے دست نہ کپتگ۔ اے گپّ ءَ دل پریشانی ئے چولی ماں ھاندان ءُ سیادانی میان ءَ چِست کرتگ.

رَسانک ءَ اے بلوچئے پجار «ابدلگنی براھویی (چنال)»، 42 سالگ، ابدلکریم ئے چُک، آروس کرتگ ءُ زھگانی پِت، بُندر ءَ دُزاپ ءِ نندوکیں مردمی زانتگ.

رَسانک ءِ ھال سرکنوکانی رِد ءَ، شپ ساھت 12:30 ئے نزّیک ءَ ھماں وھدا کہ آئی وتی لوگئے دیم ءَ اُوشتوک بوتگ اسپیتیین ءُ بے نمبر پلیٹیں پژو پارس گاڑی ئے سلاہ بندین ءُ بے پجّاریں مردمان ءَ آوار جتگ ءُ گوں وت بُرتگ.

داں انگت، ھچ سرکاری ادراہی ءَ اے کاروایی ئے زمہ واری نہ منّتگ ءُ نہ کہ اے بابت ءَ بیانی داتگ۔ اے دینی زانتکار ئے لوگئے مردمان ءَ پہ آئی ءِ ھالے سرپد ئے دست کپگ ءَ باز ترّ ءُ تاب کرتگ۔ بلے داں اے وھدا آیان ءَ روژناکیں ھالے دست نہ کپتگ ءُ اے گپّ ءَ آیانی دل پریشانی گیش کرتگ.