رَسانک نیوز/ 21 دی ماہ 1404 ءِ روچ ءَ، بچہ راھی دمگ ءَ، بچہ راھی ءُ اسپندگ ئے راہ ءَ نوک ورنائیں بلوچے چہ سیمسراں چاروگیں نزامی ٹولی ءِ تچکیں تیرگواری ءَ ماں سر ءَ تیر وارتگ ءُ ساہ داتگ.
کُشگ بوتگیں نوک ورنائے پجّار «نادر سیاھانی»، 16 سالگ، ھالکداد ئے چُک، بُندر ءَ شستون ءِ مہرگان زِلّھ ئے امان آباد دمگ ءِ نندوکیں مردمی زانگ بوتگ.
اے ھالئے رِد ءَ، ویل ئے وھدا نادر وتی پٹ پٹی ءَ سوار ءُ سیمسر ئے راہ ءَ سیاھان کوھئے بُرزگ آن ءَ روگ ءَ بوتگ کہ سیمسراں چاروگیں نزامی ٹولی ءَ بید چہ پیسریگیں جار ءُ دلگوش دیگ ءَ آئی ءِ سرا تَچکیں تیرگواری کرتگ۔ نادر ءَ ماں سر ءَ تیر وارتگ ءُ جاہ ءَ ساہ داتگ نزامی ٹولی ءَ آئی ءِ بے ساھیں جون پاسگاہ ءَ بُرتگ ءُ اوّل سر پہ بے ساھیں جون ئے ھاندان ءُ لوگئے مردمانی دست ءَ دیگ ءَ نہ منّتگ.
نزامی ٹولی ءَ لوگئے مردم گوشتگ اَنت: کہ اے ورنا چہ پٹ پٹی ئے لیٹ ورگ ءُ جَھلا کپگ ءَ ساہ داتگ، بلے ھماں وھدا کہ ھاندان ءَ وتی ورنا ئے بے ساھیں جون دیستگ، تیر ئے پد ءُ نشاں ماں آئی ءِ سر ءَ درا ءُ گوں نزامیانے داوا ءَ چپّ بوتگ.
دمگئے نندوکیں مردمانی رِد ءَ، ماں تاریک 18 ءُ 19 دی ماہ ءَ مهلوکئے زھرشانی ئے پادلپاش کنگ ءِ ھوری ءَ سیمسراں چاروگیں ٹولی ءَ ھم تیاری ئے ھُکم دیگ بوتگ۔ نزامی ٹولی چہ اے بیمّ ءَ کہ رژیم ئے ھِلاپ سلاہ بندیں مردم چہ سیمسراں مُلک ءَ تہا مہ بنت ھمیں ھاترا ھر کس کہ سیمسران ئے سرا گِندگ بوتگ، آئی ءِ سرا تیرگواری اِش کرتگ.
اولین نفری باشید که دیدگاه مینویسد