کرج ءَ مهلوکئے زھرشانی ئے وھدا نزامی ٹولیئے تیرگواری ءَ بلوچے کُشگ بوتگ

رَسانک نیوز/ سئے شمبے 30 دی ماہ 1404 ءَ، کرج ءَ بلوچے کہ ماں تاریک 18 دی ماہ ءِ بیگاہ ءَ، نزامی ٹولی ءِ مهلوکئے زھرشانی ءَ پادلپاش کنگ ءُ تیرگواری ءِ وھدا ماں سرا تیر وارتگ، چُنت روچ بے ھالے سرپدئے بوھگ ءَ رند، آئی ءِ بے ساھیں جون ماں نادراہجاہی ءَ پجّار بوتگ.

اے بلوچئے پجّار «مهسن اربابی»، 20 سالگ، مولوی ابدلهادی ئے چُک، شستون ءِ گُشت دمگئے نندوکیں مردمی زانگ بوتگ کہ پہ کارگری ءَ کرج ءَ شُتگ.

ھال وشّ ءِ ھالانی رِد ءَ، مهسن ئے ھاندان ءُ سیادانی بازیں رندگیری ءَ پد، آئی ءِ بے ساھیں جون ماں کرج ئے البرز نادراہجاہ ءَ پجّار بوتگ۔ کانونی ڈاکٹر آن ءَ پہ بے ساھیں جون ئے دیگ ءَ چہ ھاندان ءَ یک ملیارد تومن لوٹتگ ءُ گوشتگ کہ بے ساھیں جون ئے دست ءَ گِرگ ءَ پد، اے گپّ ءَ درا بہ کننت کہ مهسن بسیج ئے کارندگ بوتگ۔ بلے ھاندان ءَ اے گپّ یک سر رد کرتگ ءُ گوشتگ کہ مهسن یک کارگری بوتگ ءُ پہ کارگری ءَ کرج ءَ شُتگ ءُ گوں ھچ پیمیں امنیتی ءُ نزامی گلی ءَ ھوار نہ بوتگ.

گوشگ بیت پد چہ ایشی ءَ کہ ھاندان ءَ ڈاکٹر آنے لوٹتگیں زرّ دات نہ کرتگ، بے ساھیں جون ئے دست گِرگ بازیں جنجال آں ھوار بوتگ، دیر ءَ پد آئی ءِ جون بلوچستان ءَ سر بوتگ ءُ ماں تاریک 23 دی ماہ 1404 ءَ پیداک بوھگ ئے دمگ ءَ بزاں گشت ءَ، مانش ءَ ایئر دیگ بوتگ.

گوشگ لوٹیت انّیگیں زھرشانیاں دی ماہ ءِ پیسرگیں روچاں، پد چہ تہران ءِ کار ءُ باری مردمان ءُ سوداگرانی زھرشانی ءَ بُنگیج ماں کمّیں وھدی ءَ تیوگیں ملک ءَ تالان بوتگ اَنت۔ پد چہ ایشی ءَ کہ بلوچستان ءِ سیاسی گل ءُ پاٹیان ءَ چہ بلوچاں لوٹتگ کہ اے زھرشانی ءَ ھور بہ بنت ءُ بہر بہ زور اَنت، بلوچستان ئے دمگ آں ھم بازیں زھرشانی یے بوتگ۔ دو ھپتگ ءَ بُرز اِنت کہ رژیم ءَ انٹرنیٹ بستگ ءُ ھمیں جاورانی سوب ءَ ھال دیر ءَ دست کپنت ءُ دیر ءَ چکّاس بنت.