واش ءِ دمگ آنے سرا گوں نزامی ٹولی ئے اُرش ءَ بازیں بے سجلیں بلوچے دزگیر بوتگ

رَسانک نیوز/ چارشمبے روچ 3 دی ماہ 1404 ءَ، نزامی ءُ امنیتی ٹولی ءَ واش ءِ ناسرآباد ءُ نجپ‌آباد دمگانے سرا مزنین ءُ گرانیں اُرش ءَ گوں، ڈکّ پہ ڈکّ ءَ گشت جتگ ءُ بازیں بے سجلیں بلوچی ءَ دزگیراِش کرتگ۔ اے کاروایی گوں چُنت پٹ پٹی ئے زپت کنگ ءُ دمگ ءَ ترس ءُ بیم ئے سما ءِ دیگ ءَ ھوار بوتگ. نزامی ٹولی ءَ گوں روچئے بُن گیجی ساھت آن ءَ اُرش دست گپتگ ءُ دمگ آنے ڈکّ ءُ راہ بستگ اَنت ءُ جُست پرسش کرتگ۔ آیاں چہ مردمان ءَ پجّار ئے کاگد لوٹتگ ءُ بے کاگدیں مردمان ءَ دزگیراِش کرتگ.

اے ھالئے رِد ءَ، کارندگ آں ماں اے اُرش ءَ ڈکّ ءُ دمگان ءَ گشت ئے جنگ ءُ بے کاگدیں مردمانی دزگیر کنگ ئے ھوری ءَ چُنت پٹ پٹی ھم زپت کرتگ ءُ برتگ۔ اے پیش اَتک بید چہ روژنیں بیان ءُ کانودی بُن پدا بوتگ ءُ دمگ آں نندوکیں مردمانے ھر روچیں زندمان ماں جنجال آں دَور داتگ.

اے اناگاھیں کاروایی دمگ ءَ نندوکیں ھاندان تُرس، دل پریشانے ءُ سرگردانی ئے دیمپان کرتگ، آیاں وتی دزگیر بوتگیں مردمانے سرنبشت ئے بابت ءَ سکّ ءَ دل پریشان اَنت.