پہرہ ءَ دو بلوچیں برات کہ جُست پرس کنوکیں ادارہ ئے دست ءَ دزگیر کنگ بوتگ اَنت، پد چہ سی ءُ شش روچ ءَ چہ پہرہ ئے بندیگجاہ ءَ آجو بوتگ اَنت

رَسانک نیوز/ مروچی یکشمبے 30 آزر ماہ 1404 ءَ، پہرہ ءَ دو بلوچیں برات پد چہ ایشی ءَ کہ گاڑیانی پارکینگ ءَ آیانے کار ئے جاہ ءَ سلاہ بندیں دُزّی یے بوتگ، چہ تاریک 24 آبان ماہ 1404 ءَ، بید چہ گناہ ءُ میار ءَ، جُست ءُ پرس کنوکیں ادارہ ءَ لوٹ ءَ پد آیاں دزگیر کرتگ ءُ داشتگ۔ اے دوران ءَ پہرہ ئے جُست پرس کنوکیں ادارہ ءَ لوٹتگ گوں زھنی ءُ جسمی آزار ئے دیگ ءَ پہ زور آیان ءَ ناچار بہ کنت کہ اے دُزّی ءَ وتی سرا بزیرنت ءُ بہ منّنت. سی ءُ شش روچ ءَ پد، چہ پہرہ ئے بندیگجاہ ءَ آجو بوتگ اَنت.

رَسانک ءَ اے دوئیں بلوچانے پجّار «مهمد نھُست‌پیکر»، 21 سالگ، ءُ «اَلی نھُست‌پیکر»، 19 سالگ، ھر دو مهمداَلی ئے چُک، بُندر ءَ پہرہ ئے نندوک زانتگ.

دیمترا رَسانک ئے ھال سرکنوکان ءَ گوشتگ: اَلی پہرہ ئے امیرالمؤمنین پارکینگ ءَ کار ءَ بوتگ۔ چیزی وھد پیسرا سلاہ بندین ءُ بے پجّاریں مردمان ءَ آئی ءِ سرا اُرش کرتگ ءُ اے اُرش ءَ چُنت گاڑی ءُ یک پٹ پٹی چہ پارکینگ ءَ دُزّی بوتگ، اُرش کنوکیں مردمان ءَ اَلی لٹ ءُ شاپ کرتگ ءُ آوار جنگ ءَ پد، دُزاپ ءِ نزّیک ءَ ماں گیابان ءَ دور چہ روڈ ءَ یلاک داتگ. ویل ءَ پد، اُرش کنوکیں دُزّ آنے پجّار ءَ درگیجگ ءُ آیانی دزگیر کنگ ئے جاہ ءَ پہرہ ئے اِنساپ ئے ادارہ ئے جُست پُرس کنوکیں آپیسر «ھُسین زادہ» ءَ، اے دوئیں برات لوٹ ءَ پد داشتگ ءُ دزگیر کرتگ۔ اے دوران ءَ آیانی سرا زور دیگ بوتگ کہ اے دُزّی ءَ بہ منّنت ءُ وتی سرا بہ زور اَنت۔ بازیں لٹ ءُ شاپ ءَ اے دوئیں برات بیھوش بوتگ اَنت ءُ گوں نادراہجاہ ءِ کارمندانے میانجی گری ءَ ھوش ءَ اَتکگ اَنت٫ بلے لٹ ءُ کُٹّ ئے نشاں آیانے جون آں ایئر اَنت.

ھال سرکنوکان ءَ گوَشتگ: ایشی ءَ رَند، دوئیں برات چہ مُلاکات ءَ بے بہر ءُ پہرہ ئے بندیگجاہ ءَ دیم دیگ بوتگ اَنت، اے دوراں جُست پُرسیں ادارہ ءَ سئے پد پہ جُست پُرس ءُ آزار دیگ ءَ بُرتگ اَنت۔ آیانے لوگئے مردمان ءَ پہ ھالئے سرپدئے دست کپگ ءَ سرکارے ادارہ آن ءَ باز تر ءُ تاب کرتگ، بلے چہ ایشی ءَ دیمتر آیان ءَ الکاپیں پسّویی دیگ نہ بوتگ.