میرجاوہ ءَ گمشادزھی ءُ کهرازھی کبیلہ آنے میان ءَ، پد چہ سئے ماہ اَڑ ءُ جیڑا رازی نامہ ءُ سلاھ کاری بوتگ

رَسانک نیوز/ جمے روچ 28 آزر ماہ 1404 ءَ، میرجاوہ ئے اندہ زِلّھ ئے رنگزان دمگ ءَ گمشادزھی ءُ کهرازھی کبیلہ آنے میان ءَ پد چہ سئے ماہ اَڑ ءُ جیڑا گوں سلاھ ئے دیوان ءِ برجم دارگ ءَ رازی نامہ بوتگ۔ اے سلاھ ئے دیوان ءَ کماش ءُ دمگئے بابہروسہ ایں مردمان ءَ بہر زورتگ۔ سلاھ ئے بُن پد ئے رِد ءَ، دوئیں کبیلہ ئے مردماں پہ آں دگہ نیمگئے مردم ءُ لوگ آنے سرا دسدراجی ءَ مَنّ کنگ بوتگ اَنت ءُ پَشت کپتگیں جیڑہ آں گوں ھبر ءُ میانجی گری ءَ رندگیری بہ بنت۔ اے جیڑہ آنے سوب ءَ دیمترا ٹکّری ءَ ورنایی کارچ وارتگ ءُ ٹپیگ بوتگ.

اے سلاھ ئے دیوان ءَ، ھاجی سالھ کهرازھی، کدھُدا درمهمد کهرازھی، نورمهمد کهرازھی، الیم گمشادزھی، ھاجی ھان مهمد، رزا بلوچ ءُ کاسمی ءَ بہر زورتگ ءُ سماج ئے آرام کنگ، ٹکّر آنے دیم ئے دارگ، سلاھ نامئے بُن پد ئے پابندی ئے کنگ ءِ سرا زور داتگ.

چُنت ماہ ءَ جیڑہ ءُ ٹکّر ءَ پد، سلاھ ئے بوھگ ءَ یک بری پدا اسپیت ریشان ءُ کومی رسم ءُ رواج آنی ارزشت ءَ پہ سماج ءِ ایمن کنگ ءُ ٹکّر آنے دیم دارگ ءَ درا کرتگ۔ اسپیت ریشانے میانجی گری گوں سرکاری ادارہ آنے بے پرواھی ءَ یکی چہ اھم تریں راہ آں پہ سماجی گپچل آنی سِندگ ءُ سماج ئے آرام کنگ زانگ بیت.