رَسانک نیوز/ 21 آزر ماہ 1404 ءَ، پہرہ ئے سرکھوراں دمگ ءَ گوں دینی زانتکاران، اسپیت ریشان ءُ با بہروسہ ایں مردمانی میانجی گری ءَ برھانزھی ءُ آھورانی کبیلہ آنے میان ءَ رازی نامہ ءُ سلاھ کاری بوتگ. اے سلاھ ئے دیوان ءَ دوئیں کبیلہ آنے سروک آں، دمگ ءِ بابہروسہ ایں مردمان ءُ سماجی جُھد کار آن ءَ بہر زورتگ، گپّ ءُ ھبر ءَ پد دوئیں نیمگئے مردمان ءَ گؤستگیں اَڑ ءُ جیڑ شموشتگ اَنت ءُ پہ آرام بوھگ ءُ گوں یکّا دگرا پہ ایمنی ءُ شرّی ءَ زندمان گوازینگ ءَ رازی بوتگ اَنت.
رَسانک ئے ھال سرکنوکان ءَ گؤشتگ: سماجی جُھد کار آنے چُش کہ کازم برھانزھی، دینی زانتکاران ءُ اسپیت ریشانے جُھد ءُ کِرد پہ جنجال آنے آسر کنگ ءُ رازی نامہ ئے بوھگ ءَ سوب مند بوتگ۔ اے رازی نامہ ئے سوب جیڑہ آنے دیم دارگ ءُ سماج ءَ یک مُشت کنگ بوتگ.
بلوچی کبیلہ آنے میان ءَ پہ سلاھ ءُ رازی نامہ ءَ «بلوچی دیوان» ئے برجم دارگ، یکے چہ بلوچانے اَھدیں رسم ءُ رواج آں زانگ بیت. اے بلوچے رسم ءُ رواج آں پہ بلوچانے سماج ئے آرام کنگ ءُ آیانے یک مُشت بوھگ ءَ سوب مند بوتگنت. دمگئے نندوکیں مردمان ءَ اے رازی نامہ ئے دیوان ءَ پہ سماج ءِ آرام کنگ ءُ تپاکی ءَ سوب مندیں گامگیجی زانتگ.
اولین نفری باشید که دیدگاه مینویسد