چھبار ءَ امنیتی ٹولی ءَ بلوچے آوار جتگ ءُ چیئریں جاگہے برتگ

رَسانک نیوز/ 4 آزر ماہ 1404 ءِ شپ ءَ، چھبار ءِ امام ھُمینی روڈ ءَ امنیتی ٹولی ءَ بید چہ سرکار ئے ھُکم ءُ در چہ کانون ءَ بلوچے آوار جتگ ءُ چیئریں جاگہے برتگ۔ امنیتی ٹولی ئے اے کاروایی ءَ جھمنند دل پریشان کرتگ اَنت ءُ ھمیں وڑا اے کاروایی گوں اے بلوچئے واتساپ ئے کانال ئے بند بوھگ ءُ امنیتی ٹولی ئے پہ آئی ءِ موبایل ءَ دسرسی ءَ گوں ھوار بوتگ.

اے بلوچئے پجّار «سلمان آسکانی»، 32 سالگ، آروس کرتگ ءُ دو زھگئے پت، بُندر ءَ راسک ئے مورتان دمگئے نندوک ءُ انّیگیں وھدا چھبار ئے جھمنند زانگ بوتگ.

ھال سرکنوکان ءَ گوشتگ: امنیتی ٹولی، اے بلوچ ءَ چہ چھبار ءِ امام ھُمینی روڈ ءَ بے سرکار ئے ھُکم ءُ در کانون ءَ دزگیر کرتگ ءُ گوں وتا برتگ۔ آئی ءِ سوشل میڈیا ئے تاک آں کہ آئی ءِ موبایل ئے تہا پچ بوتگ اَنت، امنیتی ٹولی ئے دست ءَ کپتگ اَنت.

گوشگ لوٹیت: آئی ءِ واتساپ ئے بھت آزمایی ئے کانال ءَ سد ءُ سئے ھزار پالورز بوتگ۔ ھنّی اے کانال ءَ اَکسی شنگ بوتگ ءُ آئی ءِ سرا نبشتگ، اے تاک ئے دیم مجرمانہ چِست ءُ ایئر آنے ھاترا، گوں سرکار ئے ھُکم ءَ بند کنگ بوتگ.

سلمان ءَ وتی واتساپ ئے بھت آزمایی ئے کانال ءَ بازیں اِنامی چُش کہ نوکیں یاں کہ دست دوئیں گاڑی، لوگ ءُ ماڑی پہ بھت آزمایی ءَ بہر زوروکاں ایئر کرتگ ءُ مردمان ءَ بہر زورگئے بہاء داتگ ءُ آئی ءِ بھت آزمایی ءَ ھور بوتگ اَنت، گوستگیں ماہ آن ءَ بازیں جھمنندی ءَ بہر زورتگ ءُ وتی بھت ءُ تالِھ چکّاستگ۔ لہتیں چہ جھمننداں پہ اِنامئے کَٹّگ ءَ سوبین ءُ لوگ ءُ گاڑی ئے واھُند بوتگ اَنت.

داں انگت ءَ اے بلوچئے سرا بستگیں الزام ءُ دزگیر کنوکیں ادارہ زانگ نہ بوتگ.