دُزاپ ءِ پرھاد روڈ ءَ گونڈیں بلوچے چُکّے آوار جنگ بوتگ، لوگئے مردمان ءَ آئی ءِ ھالے سرپدئے دست نہ کپتگ

رَسانک نیوز/ 22 آبان ماہ 1404 ءَ، دُزاپ ءِ پرھاد روڈ ءَ گونڈیں بلوچے چُکّے ھماں وھدا کہ وتی ھمسروگانی گون ءَ لوگئے دیما گوازی ءَ بوتگ بے پجّاریں مردمان ءَ آوار جتگ ءُ داں انگت ءَ آئی ءِ ھالے سرپدئے دست نہ کپتگ، اے ویل ءَ ھاندان ءُ لوگئے مردم سکّ ءَ دل پریشان کرتگ ءُ دمگ ءُ ھند ئے ماھول ءِ سرا اسری ایئر کرتگ.

رَسانک ءَ آوار جنگ بوتگیں چُکّئے پجّار «اُوسمان براھویی»، 12 سالگ، ھمید ءِ چُک، بُندر ءَ دُزاپ ءِ مردم زانتگ.

رَسانک ءِ ھال سرکنوکانی رِد ءَ، بے پجّاریں مردماں اول سر چہ ڈکّ ءِ دپ ءَ تہا بوتگ اَنت ءُ ھماں جاہ ءَ کہ چُک گوازی ءَ بوتگ اَنت اُوشتاتگ ءُ پژو گاڑی یے آیانے کِرّا داشتگ ءُ زور ئے سرا چُک ءَ وتی گاڑی ءَ سوار کرتگ ءُ برتگ.

اُوسمان ئے ھاندان ءَ گوشتگ آیاں گوں کسی ءَ نہ دُژمنی ءُ نہ دئے ءُ گِری ھست۔ آیان ءَ چہ ھماں مردماں کہ بیت کنت اے درگت ءَ ھالے بہ زاننت لوٹتگ، ھال آں اے نمبر ءَ سر بہ کننت
09182980923
اُوسمان ءِ لوگئے مردمان ءَ چہ آوار جنوکان ءَ ھم لوٹتگ کہ ھمیں نمبر ئے سرا گپّ بہ کننت.

ھال سرکنوکان ءَ گوشتگ: اے زھگ ششمیں کلاس ئے نودربری ءُ بید چہ ایشی ءَ، کُرآن ئے دہ پارگ ھم ھِپز اِنت کہ آوار جنوکان ءَ چہ پرھاد ءِ 20 نمبر ڈکّ ءَ آئی ءَ آوار جتگ.