رَسانک نیوز/ پنچشمبے شپ ءَ 8 آبان ماہ 1404 ءَ، واش ءُ دُزاپ ءِ راہ ءَ دھپابید ءُ اسکلآباد ئے میانجی ءَ سلاہ بندین ءُ بے پجّاریں مردمان ءَ «مھمد شاھوزھی» سپاہ ءِ پاسداران ءِ جھمنندیں کمانڈر ئے سرا اُرش کرتگ کہ لہتیں چہ آئی ءِ گاٹ ءُ ھمراہ آں ٹپیگ بوتگ اَنت.
سربوتگیں ھال آنے رِد ءَ، اے کمانڈرے گاڑی ءُ آئی ءِ کاروان ءَ ھواریں سئے دگہ سپاہ ءِ گاڑی آنے سرا سلاہ بندیں مردمان ءَ چہ نزّیک ءَ زوریں تیرگواری کرتگ۔ اے تیرگواری ءَ آئی ءِ چُنت گاٹ ءَ تیر وارتگ ءُ واش ءِ نادراہجاہ ءَ سر کنگ بوتگ اَنت۔ مھمد شاھوزھی اے اُرش ءَ رکّتگ، بلے آئی ءِ گاڑی ءَ سکّ ءَ نُکس بوتگ.
مھمد شاھوزھی چہ سپاہ ءِ جھمنندیں کمانڈران ءُ یکے چہ چئیریں ادارہ ئے کارکنوکاں ماں بلوچستان ءَ زانگ بیت. انّیگیں سال آن ءَ، آئی کریم آباد ءِ بسیج ءِ بُن جاہ ءِ سروک بوتگ ءُ سرکار ءِ ھلاپ زھرشانے کنوکیں بلوچانے لگد پاد کنگ، اِنساپ لوٹوکیں ھاندان آنے بیہار دیگ، دُزاپ ءِ ھونیں جمے آن ءَ کُشگ بوتگیں مردمانے ھاندان آن ءَ لالچ دیگ ءَ مزنیں بہری زورتگ. مھمد شاھوزھی ءُ آئی ءِ ائیر دستیں ٹولی ءَ ماں 8 مہر ماہ 1401 ءَ پہ نمازیانی پادلپاش کنگ ءُ چار راہ رسولی ئے دکان آنے مان دارگ ءَ ھم بہر زورتگ.
داں انگت ءَ ھچ گل یاں کہ تنزیمی ءَ اے اُرش ئے زمہ واری نہ منّتگ.
Be the first to comment