رَسانک نیوز/ مروچی جمے 2 آبان ماہ 1404 ءَ، دُزاپ ءِ زیبا شہر ءِ شورا روڈ ءَ بلوچے کارگری کہ ماں ھُرداد ماہ ئے میانجی روچان ءَ چئیریں ادارے سادہ پوشیں ٹولی ءَ چہ کار ءِ جاہ ءَ آوار جتگ ءُ چُنت ماہ ءَ پد چہ چئیریں ادارہ ءَ پہ دُزاپ ءِ بندیگجاہ ءَ شئور دیگ بوتگ ویل ءَ چار ماہ ءَ پد داں انگت ءَ سرگردان ءُ ھیران اِنت. آئی ءِ ھاندان ءُ نزّیکیں مردمان ءَ چہ پروندہ ئے دیمروی ءُ اِنساپ ءُ ھکّ ءِ جاوران ءَ وتی دل پریشانے درشان کرتگ اَنت ءُ آئی ءِ آجویی ئے لوٹ کرتگ.
اے بلوچے پجّار «مھمود رھمتزایی »، 27 سالگ، ابداللہ ئے چُک، بُندر ءَ دُزاپ ءِ نندوک گوشگ بوتگ.
رَسانک ءِ ھال سرکنوکان ءَ گوشتگ: آئی پیش چہ دزگیر بوھگ ءَ ماڑی جوڑ کنوکیں کارگری بوتگ ءُ چئیریں ادارہ ءَ آئی چہ نیم بونڈیں ماڑیے آوار جتگ۔ ھال سرکنوکان ءَ گوشتگ: آئی ءِ سرا بستگیں تہمت «سلاہ ءِ دئے ءُ گر» زانگ بوتگ۔ آئی ءَ اے الزام چُنت پد رد کرتگ ءُ ھمیں وڑا امنیتی ادارہ آن ءَ ھچ مهکمیں سبوت ءُ مدرکی پہ بستگیں الزام ءَ نہ توانتگ پیش بہ کننت.
گوشگ لوٹیت مھمود ءِ دزگیر بوھگ ءَ چار ماہ گیش گوستگ ءُ آئی ھاندان پہ آئی ءِ جان دُراہی ءَ دل پریشان اَنت۔ ھمیں وڑا آیان ءَ در چہ کانون ءَ مھمود ءِ سرا پروندہ ئے جوڑ کنگ ءِ بابت ءَ وتی دل پریشانے درشان کرتگ اَنت.
Be the first to comment