رَسانک نیوز/ شمبے 12 مہر ماہ 1404 ءَ، پوزہ ءِ روڈ ءَ دمانے دیمترا کہنوج ئے نزامے بُنجاہ ءُ رینجرزے ٹولی آن ءَ پارس گاڑی ئے سرا بید چہ اُوشت ءُ توارے دیگ ءَ تیرگواری کرتگ۔ اے تیرگواری ءَ گاڑی بُن گپتگ ءُ ڈریور ءَ ماں آس ءَ ساہ داتگ.
رَسانک ءَ اے بلوچے پجّار «ارشاد پرامرزی»، رودبار ءِ امبر آباد دمگ ءِ نندوکیں مردمے زانتگ.
رَسانک ءَ سربوتگیں ھال آنے رِد ءَ، اے ویل ءَ پد نزامی ءُ رینجرز ئے ٹولی آن ءَ پہ کمکے سر بوھگ ءُ مدد کنوکیں ٹیمے ھال دیگ ءَ جُھد نہ کرتگ. نزامی ٹولی پد چہ تیرگواری ءُ گاڑی ئے تراک ءَ چہ جاہ ءَ در شُتگ اَنت۔ نزامے ٹولی ئے تیرگواری ءَ گاڑی ءِ ٹیلے ٹانک ءَ تیر لگتگ ءُ بُن گپتگ.
ھال سرکنوکان ءَ گوشتگ: اے گاڑی کہ نزامی ٹولی ءِ تیرگواری ءَ بُن گپتگ، ھچ پیمیں کاچاک ءُ در کانونے سامان تہا نہ بوتگ ءُ آئی ءِ نندوک ایوک ءَ ڈریور بوتگ۔ نزامی ٹولی ءِ تیرگواری ءُ گاڑی ئے زوریں تراک ءَ جھمنند آنے گون ءَ آیانے تُرندیں پیش آتک ءِ درا کنگ ءَ ھور، اے گپّ ھم درا بوتگ کہ بلوچستانے جھمنند آنے ساہ ءُ مال ءَ پہ سرکار ءُ امنیتی ٹولی ءَ ارزشتے نیست اِنت۔ اے ویل آن ءَ نزامی ٹولی ءِ ماں بلوچستان ءَ کار کردگی ئے بابت ءَ دل پریشانے گیش کرتگ.
Be the first to comment