دُزاپ ءِ بندیگجاہ ءَ بلوچے بندیگے پاھو دیگ بوتگ

رَسانک نیوز/ 30 شہریور ماہ 1404 ءِ بانگواہ ءَ، دُزاپ ءِ بندیگجاہ ءَ بلوچے بندیگے کہ دیمترا پہ مواد ءِ الزام ءَ پاھو ئے ھُکم وارتگ، پاھو دیگ بوتگ.

پاھو دیگ بوتگیں بلوچے بندیگے پجّار «ابدلازیز کلجایی»، 35 سالگ، ھبیب اللہ ءِ چُک، چار زھگے پت، بُندر ءَ دُزاپ ءِ نندوک زانگ بوتگ.

اے ھالے رِد ءَ، ابدلازیز سال 1401 ءَ دُزاپ ءَ دزگیر بوتگ ءُ گوں پروندہ ئے دیمروی ءَ اِنساپ دیوکیں ادارہ ءَ آئی ءَ پاھو ئے ھُکم داتگ، بندیگ بوھگ ءِ دوران ءَ آئی ءَ کُرآن ءِ چار پارہ ھپز کرتگ ءُ ھمیں دوران ءَ چار گشت پہ پاھو دیگ ءَ ایوکیں واڈ ءَ شور دیگ بوتگ بلے پدا ھوریں واڈ ءَ رھادگ بوتگ۔ گُڑسرا شمبے شپ ءَ پد چہ لوگے مردمانے گُڑسریں دیدار ءَ پہ ایوکیں واڈ ءَ شور دیگ بوتگ ءُ دومی‌ بانگواہ ءَ پاھو دیگ بوتگ.

گوشگ بوتگ: کُرآنے چار پارہ ئے ھپز کنگ ءِ ھاترا کول ءُ کرار اے بوتگ کہ آئی ءِ ھکم ءَ چہ پاھو ءَ یک نمبرے کم بہ کن اَنت۔ آئی ءَ اوّلیں چکّاس ءَ دُرستیں سوبے تہا نمبر یکّ ءَ در آتکگ ءُ بازیں سندے وتی نام ءَ کرتگ۔ داں گوستگیں ھپتگ ءَ ایوکیں واڈ ءَ شور دیگ ءَ پد، دومے رندا آئی ءِ چکّاس بوتگ ءُ استرس ءُ زھنی جنجال آنے سوب ءَ آئی چکاس ءَ پاس نہ بوتگ، گُڑ سرا زی بانگواہ ءَ پاھو دیگ بوتگ.