دو بلوچے برات یکّیں وھدا چہ زابل ءُ سرباز ءَ دزگیر کنگ بوتگ اَنت، یک براتے آجو بوتگ ءُ دومی برات ئے بیگواھے داں انگت ءَ برجاہ اِنت

رَسانک نیوز/ دوشمبے روچ ءَ 17 شہریور ماہ 1404 ءَ، سپاہ ئے چیریں ادارے ٹولی ءَ دو بلوچیں کارگریں برات یکّیں وھدا، یک براتے چہ زابل ءُ دومی دگہ چہ سرباز ءَ دزگیر کرتگ۔ یکے چہ اے برات آں دزگیر بوھگ ءَ چُنت ساھت پد، آجو بوتگ ءُ دومی برات داں انگت ءَ بیگواہ اِنت ءُ آئی ءِ ھالے سرپدئے نیست اِنت، اے گپّ ءَ دمگ ءُ لوگے مردم سکّ ءَ دل پریشاں کرتگ.

اے دوئیں بلوچے برات آنے پجّار «ماجد دوئاگو»، 33 سالگ، «مجیب دوئاگو»، 30 سالگ، دوئیں ابدلمجید ءِ چُک ءُ سرباز ئے دزبگان دمگ ءِ نندوک زانگ بوتگ اَنت.

اے ھالے رِد ءَ، سُہب ءِ ساھت پنچ ءَ چیریں ادارے ٹولی ءَ سرباز ءَ دزبگان دمگ ءَ ماجد دوئاگو ئے لوگے سرا اُرش ءُ گوں لٹ ءُ شاپ ءَ آئی دزگیر کرتگ ءُ لہیپ ئے تہا پیتکگ ءُ گاڑی ئے پدئیں ڈبہ ءَ جاہ داتگ ءُ گوں وت ءَ برتگ، امنیتی ٹولی ءَ آئی ءِ لوگ پٹ ءُ پول کرتگ، بلے آیان ءَ ھچ پیمیں ثبوتے دست نہ کپتگ.

ماجد ئے سیادان ءَ گوشتگ: ماجد ماڑی آنے آسن آں بند اِیت ءُ چاربند ءَ لک کنت۔ دیمترا ماجد ءَ امنیتی ٹولی ءَ چُنت گشت ءَ ماں تہران ءَ دزگیر ءُ بندیگ کرتگ. ماجد ءَ وتی شنگ کرتگیں ویڈیو آنے تہا گوشتگ: کہ آئی ءِ سرا دگہ نوکیں پروندہ جوڑ کنگ بیت، ھمیں واستا آئی ءَ سئے ماہ دیمترا وتی شہر ءَ واتر کرتگ.

ھمیں وھدا، آئی ءِ برات مجیب دوئاگو ھم چہ زابل ءَ دزگیر کنگ بوتگ، بلے نیم روچ ءَ پد آجو بوتگ. داں انگت ءَ ماجد ئے دارگ ءِ جاگہ زانگ نہ بوتگ ءُ آئی ءِ ھالے سرپدئے نیست اِنت.