میرجاوہ ئے تھلاپ دمگے سیمسراں چہ مین ءِ تراک ءَ دو بلوچے ورنائیں برات کُشگ بوتگ

رَسانک نیوز/ پنچشمبے روچ ءَ 13 شہریور ماہ 1404 ءَ، میرجاوہ ءِ تھلاپ دمگ ءِ سیمسراں چہ سپاہ ءِ کَلّ کُرتگیں مین ئے تراک ءَ دو بلوچے ورنائیں برات کُشگ بوتگ۔ اے دوئیں ورنا ھماں وھدا مین آنے دیم ءَ کُربان بوتگ اَنت کہ وتی دمگ ءَ ڈگارانی سرا کارا بوتگ اَنت۔ اے مین بے ٹِکّ ءُ نشان ءَ جاہ ءَ کل بوتگ ءُ چہ نازانتی ءَ ترکّ اِتگ.

کُشگ بوتگیں دوئیں ورنائیں برات آنے پجّار «شکراللہ ایجباری»، 16 سالگ، «مھراللہ ایجباری»، 15 سالگ، گل اھمد ئے چُک، میرجاوہ ئے تھلاپ دمگ ءِ نندوک زانگ بوتگ اَنت.

اے ھالے رِد ءَ، میرجاوہ ءِ تھلاپ دمگ ءِ سیمسراں سپاہ ءَ بے ٹکّ ءُ نشان ءَ مین کَلّ کرتگ ءُ اے دوئیں برات ھماں وھدا کہ وتی ڈگار آنے سرا کارا دلگوش بوتگ اَنت چہ نازانتی ءَ مین ئے سرا شُتگ اَنت ءُ چہ مین ئے تراک ءَ دوئیں برات کُشگ بوتگ اَنت.

گوشگ لوٹیت: ایران در چہ میان اُستمانی کانون آں، انسان کشوکیں مین ئے کارمرزی ءُ جوڑ ءُ شنگ کنگ ءَ دلگوش اِنت۔ ایران مین ءِ کل کنگ ءَ، سیمسرانے ایمن بوھگ ءِ یکّیں راہ زانت۔ انّیگیں سال آنے تہا ایران ءَ وتی سیمسراں گوں اَوگانستان، پاکستان ءُ اِراک ءَ مین کلّ کرتگ. سلاہ آنے کارمرز کنگ ءِ کمیٹی رِد ءَ، مین ئے کلّ کنگ باید اِنت کانونے راہ ءُ رھبند ءِ سرا بہ بنت، جاھے کہ مین کلّ بَنت، باید اِنت ٹکّ ءُ نشان ءُ ٹٹ بہ بنت. ھماں مُلک کہ اے کمیٹی ئے بہر اَنت، باید اِنت کہ سماجے ھکّ ءَ بزان اَنت ءُ زمین ءُ ڈگار آں چہ مین آں پاک ءُ ساپ بہ کن اَنت.