رَسانک نیوز/ سئے شمبے ءُ چارشمبے روچاں 4 ءُ 5 ءِ شہریور ماہ 1404 ءَ، دُزاپ ءُ اسپھان ئے بندیگجاہ آن ءَ دو بلوچے بندیگ کہ دیمترا پاھو ئے ھُکمش وارتگ، پاھو دیگ بوتگ اَنت۔ اے دوئیں بندیگ یکے پہ کوش ءُ آں دگہ پہ مواد ءُ منشیات ءِ الزام ءَ دزگیر کنگ بوتگ اَنت ءُ اُدے انکلاب ءُ اوامی آمیدگس آن ءَ، آیاں پاھو ئے سزا داتگ.
اے بلوچے بندیگ آنے پجّار «مھمد الی لاشاری»، 38 سالگ، کریم ئے چُک، آروس کرتگ ءُ سئے زھگے پت بُندر ءَ دُزاپ ءِ مردم ءُ انّیگیں وھدا بندر ابّاس ءِ جھمنند زانگ بوتگ۔ «اھمد دھانی»، 30 سالگ، مھمد کریم ءِ چُک، مگس ئے نندوکیں مردمے زانگ بوتگ.
مھمد الی لاشاری ھپت سال دیمترا، ماں اسپھان ءَ پہ مواد ءُ منشیات ءِ الزام ءَ دزگیر کنگ بوتگ ءُ اُدے انکلاب آمیدگس ءَ آئی ءَ پاھو ئے سزا داتگ۔ آئی سئے شمبے روچ ءَ 4 شہریور ماہ ءَ اسپھان ئے بندیگجاہ ءَ پہ ایوکیں واڈ ءَ شور دیگ بوتگ۔ آئی ءَ گوں وتی لوگے مردمان ءَ گُڑسریں دیدار کرتگ ءُ چارشمبے 5 شہریور ماہ ءَ پاھو دیگ بوتگ. اھمد دھانی ماں سال 1402 ءَ، مگس ءَ پہ کوش ءِ الزام ءَ دزگیر کنگ بوتگ ءُ آمیدگس ءَ آئی ءَ پاھو ئے ھُکم داتگ. آئی سئے شمبے 4 شہریور ماہ 1404 ءِ بانگواہ ءَ دُزاپ ءِ بندیگجاہ ءَ پاھو دیگ بوتگ.
اے بلوچے بندیگ ھماں وھدا پاھو دیگ بوتگ اَنت کہ میان اُستمانے ھکّ آنے گل ءَ ایران ءَ پہ بلوچ بندیگ آنے در چہ اِنساپ ءَ سزا دیگ، بندیگیں مردمانی ھاندان آنے سرا زور کنگ، بلوچان ءَ ھدّ ءَ ھماں دیم پاھو ءِ سزا دیگ ءِ ڈاہ داتگ. بلے ایرانے کارمستران ءُ زمہ واران ءَ اے ڈاہ مان نہ آرتگ۔ اے پیم ءَ بلوچستانے ھوری ءَ پہکیں ایران ءَ پاھو ئے دیگ ءِ سزا گیش بوتگ.
Be the first to comment