شستون ءَ دو ماہ دیمترا آوار جنگ بوتگیں بلوچے داں انگت ءَ بیگواہ اِنت ءُ امنیتی ادارہ آنے اے پروندہ ئے درگت ءَ بے پرواھی

رَسانک نیوز/ دوشمبے 20 مرداد 1404 ءَ، دو ماہ دیمترا بلوچے کہ آئی ءِ پجّار «اسمائیل سیاھانی»، دوست مھمد ءِ چُک، شستون ءَ دھک دمگے نندوگ زانگ بوتگ، چار سلاہ بندین ءُ بے پجّاریں مردمان ءَ آوار جتگ۔ اے ویل سہب ءِ ساھت ھپت ءَ، دھک ءَ تندوری ئے دیم ءَ پیش اَتکگ ءُ آوار جنوکاں پہ زور ءُ ھژم ءَ اے بلوچ ءَ وتی نُگرھیں پژو گاڑی ءَ سوار کرتگ ءُ چیریں جاگہے برتگ.

دو ماہ پد، داں انگت ءَ اسمائیل سیاھانی ئے ھالے سرپدئے دست نہ کپتگ ءُ آئی ءِ لوگ ءُ دمگے مردمانے جُھد پہ آئی ءِ شوہاز کنگ ءَ بے سوب بوتگ۔ اے وڑیں ھالان ءَ بلوچانی ایمنی ئے بابت ءَ جُھلیں دل پریشانے جوڑ کرتگ ءُ زمہ واریں ادارہ آنے پہ بلوچانے بنیادے ھکّانی سرا بے پرواھی ءَ درا کنت.

ھرکس ءَ اے ویلے درگت ءَ ھالے سرپدئے دست بہ کپیت، ھالاں پہ رَسانک ءَ سر بہ کنت.

بلوچستان ءَ چہ پیسرا ٹاھینتگیں آوار جنگ، زمہ وارانے پسّو نہ دیگ انسانے ھکّانی پادلپاش کنگ ءِ جُھلانکیاں درا کنت۔ اے وڑیں ویلاں سماج ئے تہا ترس ءُ بیمے ھالات جوڑ کن اَنت ءُ اِنساپ ءُ سُلاھ کاری ئے دیما دار اَنت.

رَسانک وتی دل پریشانی ءُ گم ءُ گُسرت ءَ پہ اسمائیل سیاھانی ئے آوار جنگ ءَ درشاں کرتگ ءُ چہ امنیتی ادارہ آں لوٹتگ کہ پہ آئی ءِ شوھاز ءُ پہکیں بلوچانی ایمنی ءَ جُھد بہ کن اَنت، ھمیں پیم ءَ رسانک ءَ چہ میان استمانے انسانی ھکّانی ادارہ آں لوٹتگ کہ بلوچستان ءَ انسانی ھکّانی پادلپاش بوھگ ءَ دلگوش بہ کن اَنت ءُ ایرانے سرکار ءَ بلوچان ءَ آیانی انسانی ھکّ ئے دیگ ءَ زور بہ کن اَنت.