رَسانک نیوز/ دوشمبے روچ ءَ 20 مرداد ماہ 1404 ءَ، چشمہ زیارت ءُ دُزاپ ءِ میان راہ ءَ دُزاپ ءِ 25 کیلومتری ءَ سلاہ بندین ءُ بے پجّاریں مردمان ءَ دو بلوچے گاڑی ئے سرا تیرگواری کرتگ ءُ دوئیں بلوچ سکّ ءَ ٹپیگ بوتگ اَنت ءُ آیان ءَ پہ درمان ءَ نادراہجاہ ءَ سر کرتگ۔ آیانی ھالت سکّ ھراب گوشگ بوتگ، اے ویل ءَ آیانی لوگے ءُ دمگے مردم سکّ دل پریشاں کرتگ.
اے دوئیں بلوچے پجّار «وھید گمشادزھی»، 27 سالگ، ھاجی مینگل ءِ چُک ءُ «بھزاد شھلیبر»، 28 سالگ، دوئیں بلوچ دُزاپ ءِ نندوک زانگ بوتگ اَنت.
اے ھالے رِد ءَ، ھماں وھدا اے دوئیں بلوچ چشمہ زیارت ءِ راہ ءَ دیم پہ دُزاپ ءَ روگ ءَ بوتگ اَنت کہ بے پجّارین ءُ سلاہ بندیں مردمان ءَ آیانی سرا تیرگواری کرتگ ءُ وھید ءَ ماں گردن ءُ کوپگ ءَ تیر وارتگ ءُ بھزاد ءَ ماں لاپ ءَ تیر لگتگ، اے وھدا دوئیں ٹپیگ ماں دُزاپ ءِ امام الی نادراہجاہ ءَ تھت ئے باھوٹ اَنت ءُ آیانی ھالت ھراب گوشگ بوتگ.
Be the first to comment