رَسانک نیوز/ 3 مرداد ماہ 1404 ءَ، دُزاپ ءِ انکلاب چارراہ ءَ، کلانتری 12 ءِ ٹولی ءَ زاتی گاڑئے دیم داشتگ ءُ آئی ءِ نندوکیں یکیّں ھاندانے مردمان ءَ لٹ ءُ شاپ ءُ بد ءُ رد کرتگ. انتزامی ٹولی ئے تُرندی ءُ ھژم ھمینچو بوتگ کہ اے ھاندانے یک ورنایی ءَ وتی مستریں برات ءِ لٹ ءُ کُٹ اُپار نہ برتگ ءُ آئی پہ وتی برات ءِ بدل ءَ گوں کلانتری ئے ٹولی ءَ اَڑتگ، بلے آیان ءَ اے ورنا ھم لٹ ءُ شاپ کرتگ. کلانتری ئے ٹولی ءَ پہ ترس ءُ بیم ئے دیگ ءُ ھاندانے آں دگہ مردمانے دیم دارگ ءَ ھوایی تیرگواری کرتگ.
اے ھالے رِد ءَ، امنیتی ٹولی ءَ گوں سلاه ئے کُنداک ءَ اے ھاندانے سرا اُرش کرتگ ءُ گوں لٹ ءُ شاپ، بد رد کنگ ءُ ھژم ءُ ترندی سرا لوٹتگ کہ آیان ءَ پہ شور ورگ ءَ مہ ھلّنت. ویڈیو رکاڈ ءَ امنیتی ٹولی ئے پیش آھگ ءَ گوں اے بلوچے ھاندان ءَ درا کرتگ ءُ پیش داشتگ.
داں انگت ءَ زانگ نہ بوتگ کہ اے ویل ءَ پد اے ھاندان ئے مردم دزگیر ءُ بندیگ کنگ بوتگ اَنت یا کہ نہ، ھمیں پیم ءَ آیانی پجّار زانگ نہ بوتگ.
بلوچستان ءَ امنیتی ءُ انتزامی ٹولی آنے بلوچاں گوں پہ زپتی ءُ ھژم ءَ پیش آھگ، اُدے جھمنندانے زھنی سکون ئے برباد کنگ ءَ ابید، سرکارے بلوچانے پادلپاش کنگ ئے سیاست ءَ درا کنت.
Be the first to comment