تامیمے بلوچے آوار جنگ ءَ ماھے ءَ پد، داں ھنگت ءَ بیگواہ اِنت

رَسانک نیوز/ ۳۱ اردیبهشت ماہ 1404 ءَ، دُزاپ ءِ چاه‌اھمد دمگ ءِ نندوکیں بلوچے کہ دیمترا چہ سپاہ ءِ چیریں اداره ءَ تامیم ءُ جان بکشی ءِ کاگد دیگ بوتگ، امنیتی باسک ءِ ٹولی ءَ آئی ءِ لوگ ءِ سرا اُرش ءَ پد، آوار جتگ ءُ چیریں جاگہے بُرتگ.

اے بلوچے پجّار «رھمت‌اللہ شہ‌بکش پیوندی»، 40 سالگ، اسمائیل ءِ چُک، دُزاپ ءِ چاه اھمد دمگ ءِ نندوک زانگ بوتگ.

اے ھال ءِ رِد ءَ، چیزے وھد دیمترا امنیتی باسک ءَ رھمت اللہ ءِ سرا مردمے آوار جنگ ءُ بیگواہ کنگ ءِ الزام جتگ ءُ ھمیں ھاترا آئی ءِ پدا بوتگ اَنت. بلے کماش ءُ اسپیت ریشانی جُھد ءَ پد، رھمت اللہ ءِ بیگناهی درا بوتگ ءُ سپاه ءِ چیریں اداره ءَ، آئی ءَ جان بکشی ءِ کاگد داتگ ءُ اے پیم ءَ رھمت اللہ ءَ تامیم رستگ. چیزے وھد پیسرا، دُزاپ ءِ چیریں ادارے کارمند رھمت اللہ ءِ لوگ ءِ سرا اُرش کرتگ ءُ پہ زور ءُ ھژم ءَ آئی آوار جتگ ءُ داں اے وھد ءَ بیگواہ اِنت.

گوشگ بِیت: کہ رھمت اللہ ءِ آوار جنگ ءُ بیگواہ کنگ ءَ ماھے بُرز اِنت، بلے امنیتی باسک ءُ چیریں ادارے کار مستران ءَ آئی ءِ لوگ ءِ مردمان ءَ دلجمی ھالے نہ داتگ۔ چیریں ادارے مستران ءَ رھمت اللہ ءِ لوگ ءِ مردماں گوشتگ: اے گپّ الّم بوتگ کہ رھمت اللہ آوار جنگ ءُ بیگواہ کنگ ءِ کیس ءَ بے گناه اِنت، بلے چیریں اداره ءَ آئی ءَ وت سرا داشتگ.

اداں شرّیے سرا جاہ کئیت، کہ امنیتی باسک ءُ چیریں اداره، سرکار ءِ انساپ دیوکیں اداره بہ بیت یا کہ کماش ءُ اسپیت ریشیں مردم بہ بنت، کسی ءَ مان نہ آر اَنت.
اے پیمیں ویل ءُ واکاں بلوچ راج ءِ بہروسہ ءَ سرکار ءِ سرا کم ءُ کمتر کن اَنت.