رَسانک نیوز/ دوشمبے 18 ھُرداد ماه 1404 ءِ بانگواه ءَ، دُزاپ ءِ بندیگجاہ ءَ بلوچ بندیگے کہ دو سال دیمترا پہ ھون ءُ کوش ءِ الزام ءَ دزگیر کنگ بوتگ، پد چہ ایشی ءَ کہ آئی ءِ لوگ ءِ مردمان ءَ نہ توانتگ کُشگ بوتگیں مردم ءِ پشت ءُ پد ءِ رزاھت ءَ بہ گر اَنت، پاھو دیگ بوتگ.
پاھو داتگیں بلوچ ءِ پجّار «ابدلباست شھدادزھی» 25 سالگ، رھیمبکش ءِ چُک، واش ءِ ایرندگان ءَ کھنو دمگ ءِ نندوک زانگ بوتگ.
کمپین فعالین بلوچ، اے بابت ءَ گوشتگ: یک ھوریں ھشر ءُ اَڑ ءُ جیڑئے تہا یک نپرے کُشگ بوتگ ءُ ابدلباست ءِ برات ٹپیگ بوھگ ءَ پد، دزگیر کنگ بوتگ. اے ھال ءِ رِد ءَ، ابدلباست ءَ ھچبر ھون ءُ کوش ءِ الزام ءَ وتی سرا نہ منّتگ ءُ گوشتگی کہ اے اڑ ءُ جیڑئے وھدا آئی ءَ ھچ پیمیں سلاھی گون نہ بوتگ. بلے آئی ءِ کٹھمدان ءِ سروک ءُ کماشیں مردمان ءَ آئی ءَ امنیتی باسک ءِ دست ءَ داتگ داں کہ کُشگ بوتگیں مردم ءِ پشت ءُ پد شرتر رازی بہ بنت ءُ سلاہ کاری بہ بیت، بلے دیمیں مردمان ءَ نہ منتگ ءُ رزاھت اِش نہ داتگ ءُ زی ابدلباست ماں دُزاپ ءِ بندیگجاہ ءَ پاھو دیگ بوتگ.
گوشگ لوٹیت: سال 2024 ءَ، 111 بلوچ بندیگ ماں ایران ءِ 23 شھر ءِ تہا پاھو دیگ بوتگ اَنت۔ اے میان ءَ 83 بندیگ پہ مواد ءُ منشیات ءِ الزام، 25 بندیگ پہ ھون ءُ کوش ءِ الزام، 3 بندیگ پہ زانگ نہ بوتگیں سوب ءَ پاھو دیگ بوتگ اَنت.
Be the first to comment