بیرجند ءِ بندیگجاہ ءَ شش بندیگ چہ بلوچستان ءِ جھمننداں پاھو دیئگ بوت

رَسانک نیوز/ یکشمبے روچ ءَ 14 اردیبھشت ماہ 1404 ءِ بانگواہ ءَ، بیرجند ءِ بندیگجاہ ءَ ھپت بندیگ پاھو دیَگ بوتگ. شش بندیگ بلوچستان ءِ نندوک انت ءُ یکیں بندیگ چہ‌ ھُراسان ءِ سُنّی مزھبیں جھمننداں بوتگ.

پاھو دیئگ بوتگیں بندیگانی پجّار «ھُسرو سارانی»، 42 سالگ، گلام رسول ءِ چُک، آروس کرتگ ءُ دو زھگ ءِ پت ءُ ھیرمند ءَ دوس مھمد دمگ ءِ نندوک، «مھمود سارانی (رکشانی)»، 41 سالگ، ھاجی گلام ءِ چُک، بُندر ءَ ھیرمند ءِ دمگ ءَ سارانی ءِ نندوک ءُ ھنیگیں وھد ءَ گلستان ءِ آزاد شھر ءُ دُزآپ ءِ جھمنند، «یوسف سرور وش ( نارویی )»، 52 سالگ، جاں مھمد ءِ چُک، 4 زھگ ءِ پت ءُ دزاپ ءِ نندوک، مجتبی لکزایی، 34 سالگ، ھَئیر مھمد ءِ چُک، آروس کتگ ءُ یک زھگ ءِ پت، بُندر ءَ زابل ءُ ھنیگیں وھد ءَ دُزاپ ءِ جھمنند، «الی نوری» 35 سالگ، آروس کتگ ءُ دو زھگ ءِ پت، بُندر ءَ زابل ءِ مردم ءُ ھنیگیں وھد ءَ گلستان ءَ آزاد شھر ءِ جھمنند، «الی رزا لالوزایی» 52 سالگ، مشھد ءِ جھمنند، «موسی شکوھی»، 40 سالگ، ھُراسان ءِ رزوئے تربت جام ءِ جھمنند زانگ بوتگ.

گوشگ بیت که اے تمامیں ھپت بندیگ مواد ءُ منشیات ءِ جتائیں الزامانی دیم ءَ پاھو ءِ سزا دیگ بوتگ اَنت کہ شمبے روچ 13 اردیبھشت ماہ 1404 ءَ، پیشیم ءِ ساھت یکّ ءَ، پہ ایوکیں وارڈ ءَ شور دیگ بوتگ اَنت.

ھُسرو ءُ الی سال ءِ 1400 ءُ مھمود ءُ الی رزا، یوسف ءُ موسی سال ءِ 1401 ءَ، مجتبی سال ءِ 1402 ءَ ماں سھل آباد ءَ پہ مواد ءُ منشیات ءِ الزام ءَ دستگر بوتگ اَنت ءُ نھبندان ءِ انکلاب آمیدگس ءَ آیان ءَ پاھو ءِ سزا داتگ.

ایران ءِ کانون ءِ رِد ءَ، پاھو ءِ سزا ءَ پیسر، باید اِنت کہ بندیگ ءَ گوں لوگ ءِ مردماں پہ گُڑ سریں گندوک ءَ بل اَنت، بلے ایشان ءَ پاھو ءَ پیسر اے ھک دیگ نہ بوتگ.