رَسانک نیوز، چارشمبہ روچ 3 اردیبھشت ماہ 1404 ءَ ایران ءِ سرکاری ٹی وی ءِ (سیمای خانوادہ) پروگرام ءَ کہ اے ٹی وی ءِ یک نمبر کانال ءَ شنگ کرتگ، آئی ءِ تہا بہر زوریں نندوکان ءُ کار زانتاناں حضرت ابوبکر ءِ شان ءَ گستاخی کرتگ. اے گپّ ایران ءُ تمامیں مسلمانانی زھر کِن کرتگ اَنت.
اے پروگرام ءَ یکی چہ نندوکان ءُ کار زانتاناں حضرت ابوبکر ءِ شان ءَ گستاخی کرتگ ءُ سنی ءٗ مسلمانانی زھر کِن کرتگ اَنت۔ حضرت ابوبکر سنّی ءُ مسلمانانی پیسریں هلیفہ زانگ بیت. حضرت ابوبکر چہ واجہ حضرت محمد ءِ نزدیکین ءُ با بھروسہ ایں ھمبلاں زانگ بیت، کہ آئی ءِ توھین ءُ گستاخی ایران ءِ سنّی سماج ءِ زھر کنی کیش کرتگ.
اے اولیں بار نہ اِنت کہ سنی دین ءُ مذھب ءِ توھین ءُ گستاخی ماں سرکاری ٹی وی ءَ بوتگ، پدا پیش ھم ھر چنت وھد ءَ پد، چُشیں گستاخی گندگ بوتگ، کہ سنّی سماج ءَ وتی زھرشانی ھم کرتگ ءُ سرکار ءَ کول ءُ وعدہ داتگ کہ گستاخان ءَ سزا دنت بلے سرکار ءَ ھچ پیمیں گامی آیانی خلاف ءَ نہ زورتگ.
ایران ءِ سرکاری ٹی وی کہ ڈارکٹ هامنہ ای دست ءِ چیر اِنت ءُ آئی ءِ گپّ ءَ دگر نہ کنت ءُ اے پیمیں غیر زمہ داریں هرکت بہ کنت گڑا اے ناشرکاری ءِ زمہ دار هامنہ ای جند اِنت. اے سرکاری ٹی وی ءِ راہ ءُ رھبند اے وڑا جوڑ کنگ بوتگ کہ ھر پروگرامی داں بیت رھبری ءَ تصدیک ءُ پاس مہ بیت آئی ءَ شنگ ءُ تالان کنگ ءِ هک دیئگ نہ بیت۔ گڑا اے پیمیں گستاخی یک کسی ءِ نازانت کاری زانگ نہ بیت، بلکے تمامیں زمہ داران ءُ حتی کہ هامنہ ای ءِ جند اے ویل ءُ واک ءَ میاریگ اَنت.
اے پیمیں گستاخیانی دمب پہ دمب بوھگ آں ھم سرکار ءِ ٹی وی پروگرام ءِ تہا کہ آئی ءِ بجٹ ءُ زر سرکار ءِ جند دنت ءُ آئی ءِ زمہ داری کوم ءِ تہا مذھبی ءُ دینی تپاکی پیدا کنگ اِنت، پیش داریت کہ سرکار لہتیں کوم ءُ مذھبان ءَ گوں دگہ چمّی چاراِیت ءُ آیاں هکیر زانت ءُ کم لیکیت. اے ویل ءُ واکاں ایران ءِ سرکار ءِ تپاکی ءُ یک مشتی ءِ جار ءُ کوکاراں دروگ زانت ءُ کوم ءِ بھروسہ ءَ سرکار ءِ سرا کم کنت، مذھبی ءُ دینی پِرگہ بازی ءَ گیشتر کنت.
Be the first to comment