دلگانا دو بلۆچ جهمنند گۆن نزامی نیروانی تیرگواریان ٹپّیگ و کُشگ بوتگ‌اَنت

رَسانک نیوز

دوشمبهئے رۆچا ۸ بهمن ۱۴۰۳، دو بلۆچ جهمنند گۆن نزامی و امنیتی زاتی درێسێن نیروانی تیرگواریان دلگانا و کساس امام اَلیئے پلکهئے سرا تیرانی آماچ بوتگ که یکّے چه دوێنان وتی ساه چه دستا داتگ و دگه یکّے چه آیان آوار جنَگ بوتگ.

کُشگ بوتگێن جهمنندئے پجّار (ابول بامری)، ۳۰ سالگ، شاپورئے چُکّ و دلگانئے مردم گوشگ بوتگ و چه ٹپّیگ بوتگێن جهمنندئے پَجّارا تنیگت هچ هالے نێست.

گێشێن هالانی رِدا، امنیتی نیروان گۆن زاتی پلاکێن ماشین و بێد چه پێسری هُشدارا اے جهمنندێن بلۆچئے نێمگا تیرگواری کُرتگ که ابولا گۆن چُنت تیرئے لگّگا وتی ساه چه دستا داتگ و دگه یکّے گۆن چُنت تیرئے لگّگا ٹپّیگ و امنیتی نیروانی دستا آوار جنَگ و نامالومێن جاهے برگ بوتگ.

چه اے تیرگواریئے سئوبا و چه آوار جنَگ بوتگێن جهمنندئے آوار جنَگئے سئوبا تنیگت هالے نێست.

گۆن ۲۰۲۳ئے سالائے جم بوتگێن هالان، نزامی نیروانی راستێن تیرگواری سئوب بوتگ که کم چه کم ۱۲۰ بلۆچێن جهمنند کُشگ و ٹپّیگ کنگ ببیت. اِشانی تها ۸۰ کسا وتی ساه چه دستا داتگ و ۴۰ کس ٹپّیگ بوتگ که اِشانی تها ۹ گوَنڈێن چُکّ و ۳ جنێن هست‌اِنت.