پهرها یک بلۆچ ٹێلکشّے گۆن ماشینئے چپّ کنگا و شێپئے کپگا بێران بوتگ

رَسانک نیوز

سئے شَمبِهئے رۆچا ۴ دئے ۱۴۰۳، گۆن یک ٹێلکشّێن ماشینیئے کپگا مان شێپئے تها واش و پهرهئے راها، کساس کارواندرئے نزّیکا واشئے دمگان، یک جهمنندێن بلۆچ ٹێلکشّا وتی ساه چه دستا داتگ.

اے بلۆچ ٹێلکشّئے پجّار (اَلیرزا براهویی)، ۲۰ سالگ، سُلئیمانئے چُکّ و دُزآپئے نندۆک گوَشگ بوتگ.

گێشێن هالانی رِدا، اے وئیل کساس بانگواهئے ساهت یکّا پێش آتکگ و اِلیرزائے ماشین گۆن نامالومێن سئوبیا چه کنترلا درآتکگ و شێپئے تها شُتگ که اے وئیلئے سئوبا، آییا گۆن بازێن ٹپّانی سئوبا وتی ساه چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.