شستونا دو بلۆچ جهمنند گۆن کمین کُرتگێن نزامیانی تیرگواریان کُشگ بوتگ‌اَنت

رَسانک نیوز

جُمَهئے رۆچا ۱۱ آبان ۱۴۰۳، نزامی و امنیتی نیروان شستونئے شهرا هُمئینیئے هئیابانا کمین کُرتگ و یک پژو ۴۰۵ێن ماشینیئے نێمگا بێد چه اۆشتارێنگ و پێسری هُشدار دئیگا تیرگواری کُرتگ و سئوب بوتگ که دوێن مردم که ماشینا بوتگ‌اَنت کُشگ ببنت.

چه اے کشُگ بوتگێن جهمنندئے پجّارا تنیگت هچ هالے نێست.

گێشێن هالانی ردا، کساس سُهبئے ساهت پنچا، نزامی و امنیتی نیروان گۆن زاتی پلاکێن ماشینان هُمئینیئے هئیابانا کمین کُرتگ و یک پژو ۴۰۵ێن ماشینیئے نێمگا بێد چه پێسری هُشدار دئیگ و اۆشتارێنگا تیرگواری کُرتگ که سئوب بوتگ کم چه کم دو مردم چه ماشینئے نندۆکێن مردمان کُشگ ببنت و پد چه آییا آیانی لاش و ماشینِش گۆن وت بُرتگ‌اَنت.

گۆن ۲۰۲۳ئے سالائے جم بوتگێن هالان، نزامی نیروانی راستێن تیرگواری سئوب بوتگ که کم چه کم ۱۲۰ بلۆچێن جهمنند کُشگ و ٹپّیگ کنگ ببیت. اِشانی تها ۸۰ کسا وتی ساه چه دستا داتگ و ۴۰ کس ٹپّیگ بوتگ که اِشانی تها ۹ گوَنڈێن چُکّ و ۳ جنێن هست‌اِنت.