سربازا سئے بلۆچ جهمنند گۆن جادهی وئیلا بێران و ٹپّیگ بوتگ‌اَنت

رَسانک نیوز

دوشمبهئے رۆچا ۱۶ مهر ۱۴۰۳، دو ماشینئے که یکّے ٹێلکشێن تیباے و دگرے پژو ۴۰۵ێن ماشینے بوتگ سرباز و راسکئے راها تسادپ کُرتگ و یک مردمیا وتی ساه چه دستا داتگ و دگه دو کس ٹپّیگ بوتگ‌اَنت.

بێران بوتگێن جهمنندئے پجّار (یوسپ کوهی)، کدوسئے چُکّ و ٹپّیگ بوتگێن مردمے پجّار که یوسپئے همراه بوتگ (جاسم کوهی)، الیاسئے چُکّ و هر دوێن نۆتئے مردم و ٹپّیگ بوتگێن مردمئے پجّار (جابر دهکانی)، شهمیرئے چُکّ، بندانئے هلکئے مردم چه سربازئے دمگان گوَشگ بوتگ.

گێشێن هالانی ردا، اے وئیل کساس کجۆمئے هلکئے دمگان سربازئے شهرا، پد چه اشیا که جابرا بار هالیگ کُرتگ و وتی لۆگا واتر کنگا بوتگ پێش آتکگ که پژوئے نندۆکان یک مردمے بێران بوتگ و جابر و پوسپئے همراه سکّ ٹپّیگ بوتگ‌اَنت و پهرهئے هاتمُل انبیائے نادراهجاها برگ بوتگ‌اَنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.