پهرجا گۆن نزامی نیروانی تیرگواریان دو بلۆچ جهمنندئے نێمگا آیانی ماشین چپّ بوتگ و یکّے کُشگ و دگرے ٹپّیگ بوتگ

رَسانک نیوز

دوشمبهئے رۆچا ۹ مهر ۱۴۰۳، گۆن نزامی نیروانی تیرگواریان یک بلۆچ جهمنندے ماشینئے نێمگا پهرجئے هلکا، ماشینا تیر وارتگ و لاستیگ ترَکّتگ و چپ بوتگ و یکے چه ماشینئے نندۆکان گۆن بازێن ٹَپّان وتی ساهی چه دستا داتگ و دگه مردمے سکّ ٹپّیگ بوتگ.

کُشگ بوتگێن بلۆچئے پجّار (اسماێل نارویی)، کساس ۲۱ سالگ، نورمهمدئے چک و ٹپّیگ بوتگێن بلۆچئے پجّار (اَبدُل رهمان نارویی)، ۳۲ سالگ، ولی مهمدئے چُکّ و هر دوێن نسرت آبادئے مردم چه دُزآپئے دمگان گوَشگ بوتگ‌اَنت.

گێشێن هالانی رِدا، نزامی نیروان پهرج و دُزآپئے راها بێد چه پێسری هشدار دئیگ و اۆشتارێنگا اسماێلئے ماشینئے نێمگا راستێن تیرگواری کُرتگ که تیرانی ماشینئے ٹئێران لگّتگ و چپّ بوتگ و اسماێلا وتی ساه چه دستا داتگ و اَبدُل رهمان سکّ ٹپّیگ بوتگ که پهرجئے نادراهجاها برگ بوتگ و بێهۆشیئے جاورا هاسێن جاها واپێنگ بوتگ.

گۆن ۲۰۲۳ئے سالائے جم بوتگێن هالان، نزامی نیروانی راستێن تیرگواری سئوب بوتگ که کم چه کم ۱۲۰ بلۆچێن جهمنند کُشگ و ٹپّیگ کنگ ببیت. اِشانی تها ۸۰ کسا وتی ساه چه دستا داتگ و ۴۰ کس ٹپّیگ بوتگ که اِشانی تها ۹ گوَنڈێن چُکّ و ۳ جنێن هست‌اِنت.