رَسانک نیوز

یکشَمبِهئے رۆچا ۸ مهر ۱۴۰۳، مهمدانئے هلکا چه پهرهئے دمگان یک سئواری ٹێلکشێن ماشینے چپّ بوتگ و ماشینئے راننده چه بازێن ٹپّانے که آییئے جانئے سرا بوتگ‌اَنت وتی ساهی چه دستا داتگ.

اے بێران بوتگێن بلۆچئے پجّار (وهید سندک زهی)، کساس ۳۳ سالگ، دۆست مهمدئے چُکّ و سور کُرتگێن و سئے چُکّئے پت و چاه جمالئے نندۆک چه پهرهئے دمگان گوَشگ بوتگ.

اے وئیل کساس شپئے ساهت هشتا مهمدانئے هلکا و پهرهئے دمگان پێش آتکگ و ٹێلکشێن سئواری ماشین گۆن نامالومێن سئوبان چپّ بوتگ و ماشینئے راننده بازێن ٹَپّانی سئوبا وتی ساهی چه دستا داتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.