رَسانک نیوز

جُمَهئے رۆچا ۶ شهریور ۱۴۰۳، لوتکئے هلکا زابلئے دمگان یک سئواری ماشین و یک ٹێلکشێن تویوتا وانتے ڈیکّر وارتگ، یک ٹێلکش بلۆچے آسئے تها سُتکگ و یک ٹێلکشے و چار مردم چه سئواری ماشینئے نندۆک ٹپّیگ بوتگ‌اَنت.

بێران بوتگێن ٹێلکشئے پجّار (مهمود براهویی)، ۲۵ سالگ، اهمدئے چُکّ، سور کُرتگێن و یک چُکّێئے پت و لوتکئے مردم چه زابلئے دمگان گوَشگ بوتگ‌اَنت و چه ٹپّیگ بوتگێن ٹێلکش و اے دگه جهمنندانی پَجّارا تان انّون هچ هالے نێست.

گوَشگ بیت اے دوێن ماشینانی ڈیکّر ورگ سئوب بوتگ که آس بگرنت و ٹێلکشێن رانندهئے ماشین آسئے تها وتی ساهی چه دستا داتگ و ٹێلکشێن ماشینئے شاگرد و چار مردم چه سئواریئے ماشینئے مردمان ٹپّیگ و نادراهجاها برگ بوتگ‌اَنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.