رَسانک نیوز

شمبهئے رۆچا ۲۵ شهریور ۱۴۰۳، یک ۱۶ سالگێن نۆک ورناے، چه نازیلا مارندگانیئے سیادان که امنیتی نیروانی دستا واشئے سئے راهیا ۱۶ مرداد وتی چُکّ و مرد و دگه دو مردمئے همراهیا تیرگواریانی آماچ بوتگ و گۆن تیرئے لگّگا وتی ساهی چه دستا داتگ، اداره اتلاهاتئے نیروانی دستا ارومیهئے شهرا آوار جنگ و دُزآپا برگ بوتگ.

اے نۆک ورناێن بلۆچئے پجّار (امیرمهمد ایرندگانی)، ۱۶ سالگ، نورمهمدئے چُکّ، نازیلا ایرندگانی ناکو زهتئے چُکّ و مهمد ایرندگانیئے گُهار زهت که چُنت رۆچ پد چه وئیلا بێران بوتگ، زیرکیک ایرندگانیئے هلکئے مردم چه واشئے دمگان گوَشگ بوتگ.

گێشێن هالانی رِدا، ۲۵ شهریورئے سُهبا، امرومیهئے اداره اتلاهاتئے نیروان امیرمهمد که یکّے چه وتی سیادانی لۆگا بوتگ پد چه اُرش برگا آوار جتگ و چه ارومیه، تهرانا برگ و پدا چه تهرانا مان دُزآپا و اے شهرئے ادارهئے بندیگا برگ بوتگ.

گوشگی اِنت که پێسرا هم ۶ و ۹ئے شهریورا دو برات گۆن (‏اسماێل ایرندگانی)، ۲۵ سالگ و (اسهاک ایرندگانی)، ۳۲ سالگێن پَجّارا، که هر دوێن ابراهێمئے چُکّ و نازیلا ایرندگانیئے ناکو زهت بوتگ‌اَنت، امنیتی نیروانی دستا گۆن (هُسئین اَلی پیری[واشئے کُشگ بوتگێن رئیس پلیس])ئے کُشگئے جُرما آوار جنَگ و انّون گۆن ۲۰ رۆچئے گوَزگا انگت هچ هبرے چه آیانی هالا نێست.

گوشگی اِنت که جُمَهئے رۆچا ۲ شهریور ۱۴۰۳، واشئے آگاهی رئیس (هُسئین پیری)، زابلئے مردم که گوستگێن رۆچان واشئے بلۆچێن جهمنندێن مردمی آوار جتگ و آزاری داتگ‌اَنت، جئیشُل اَدلئے مردمانی دستا کُشگ بوتگ.