رَسانک نیوز

شَمبِهئے رۆچا ۲۴ شهریور ۱۴۰۳، دو ٹێلکشێن ماشین که یکّے وانت و دگرے ٹێلکشێن پرایدے بوتگ واش و شستونئے راها کساس میلادئے پمپ بنزینئے کِرّا سۆه کلهورئے دمگا، یک بلۆچ ٹێلکشیا وتی ساه چه دستا داتگ و دگه سئے کس ٹپّیگ بوتگ‌اَنت.

بێران بوتگێن ٹێلکشئے پجّار (هپیزُلّاه نوتی زهی)، ۲۳ سالگ، سور نکُرتگێن، نئوابئے چُکّ و واشئے نندۆک و چه آ دگه بێران بوتگێن و ٹپّیگ بوتگێن مردمانی پَجّارا تان انون هچ هالے نێست.

اے وئیل کساس کۆه کلهورئے دمگان، واشئے ۳۰ کیلومتریا و واش و شستونئے راها پێش آتکگ که یک پرایدێن ٹێلکشے و یک رهگوزێن تویوتاییا ڈیکّر وارتگ و ٹێلکشئے ماشینئے شاگرد آسئے تها وتی ساهی چه دستا داتگ و آییئے راننده و دگه دو مردم ٹپّیگ بوتگ‌اَنت.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.