چارشمبهئے رۆچا ۲۱ شهریور ۱۴۰۳، یک جهمنندێن بلۆچ ٹێلکشّے جکگورئے سیمسرئے هنگئے نیروانی دستا چه راسکئے دمگان بێد چه پێسری اۆشتارێنگ و هُشدار دئیگا تیرانی آماچ کُرتگ و گۆن تیرئے لگّگا ٹپّیگ بوتگ.

اے بلۆچ ٹیلکشّئے پجّار (هلیل آسکانی)، ۲۹ سالگ، اسماێلئے چُکّ و مۆرتانئے نندۆک چه راسکئے دمگان گوَشگ بوتگ.

گێشێن هالانی رِدا، هلیل کساس سُهبئے ساهت پنچا، گۆن وتی براتئے هۆریا که وانت تویوتایا سئوار بوتگ‌اَنت جکگورئے سیمسرئے هنگئے نزامیانی دستا بێد چه اۆشتارێنگ و هُشدار دئیگا تیرانی آماچ کُرتگ که آیی گۆن تیرئے لگّگا ٹپّیگ و راسکئے نادراهجاها په دوائے واستا برگ بوتگ.

گێشێن هالانی رِدا که چه ائولئے ۲۰۲۳ئے سالا جم کنک بوتگ‌اَنت، کم چه کم ۳۲۱ کس چه ٹێلکشّێن بلۆچان گۆن وڑ وڑێن وئیلان، کُشگ و ٹپّیگ کنگ بوتگ‌اَنت که نزامی نیروانی راستێن تیرگواریانی تها ۲۸ ٹێلکشّا وتی ساه چه دستا داتگ و ۱۷ کس ٹپّیگ بوتگ. جادهی وئیلانی تها هم ۱۹۴ کس ٹپّیگ بوتگ. نامالومێن مردمانی تیرگواریان هم ۸ کسا وتی ساه چه دستا داتگ و ۲ کس ٹپّیگ بوتگ. دگه وئیلانی تها چۆ هار، آس سۆچی ٹێلئے ڈیپوئے تها و یک دگه نامالومێن مئوردے تها هم کم چه کم ۱۴ کس ٹپّیگ و بێران بوتگ.