رَسانک نیوز

شَمبِهئے رۆچا ۲۴ شهریور ۱۴۰۳، پهلئوانئے هلکا دوست مهمدئے شهرا چه هیرمندئے دمگان کئومی سلاهبنڈدێن درگیریا کم چه کم یک بلۆچ جهمنندے بێران و ۹ کس ٹپّیگ بوتگ که دو کس چه آیانی هال سکّ هراب اِنت.

کُشگ بوتگێن جهمنندئے پجّار (اَبدُلّاه گله‌بچه)، ۳۰ سالگ، شێرئے چُکّ، سور کُرتگێن و چار چُکّئے پت و یکّے چه ٹپیگێن مردمانی پجار که سکّ هالی هراب اِنت (جُما گله‌بچه) گوَشگ بوتگ و چه آ دگه ٹپّیگ بوتگێن مردمانی هالا هچ هبرے نێست.

گێشێن هالانی رِدا، شَمبِهئے رۆچا گله‌بچهئے کٹمئے نیاما دۆست مهمدئے شهرا گۆن کلاشینکپ و شکاری تُپنگئے گۆما درگیری پێش آتکگ که یک مردمے گۆن تیرئے ورگا وتی ساهی چه دستا داتگ و کم چه کم ۹ مردم گۆن ساچمهی و جنگی تیرانی گۆما ٹپّیگ بوتگ‌اَنت و دو مردمے هال سکّ هراب اِنت.

چه درگیریئے سئوبئے هالا تان انّون هچ هبرے نێست بله گوَشگ بیت که ٹپّیگ بوتگێن مردم زابلئے نادراهجاها برگ بوتگ‌اَنت.