رَسانک نیوز

گوستگێن شپا ۲۴ شهریور ۱۴۰۳، یک کسانێن چُکّے چه دُزآپئے مکی مسیتئے نمازجاها دربوتگ، گۆن لاتانی تیرگواریان، چئری‌ای تیری لگّتگ هما جاها ساهی  داتگ.

اے چُکّئے پجّار (اَلی اکبر کمبرزهی)، کساس ۱۱ سالگ، مهمودئے چُکّ و دانشجوئے هئیابانئے نندۆک چه دُزآپئے هئیابان گوَشگ بیت.

گێشێن هالانی رِدا، اَلی اکبر دُزآپئے مکی مسیتا دلکَشّی گۆما کارا بوتگ، پد چه وتی ٹێما وتی لۆگا واتر کنگا بوتگ که لاتێن مردمانی تیرگواریانی گۆما تیر وارتگ و وتی ساهی چه دستا داتگ.

گوشگی اِنت که اے کسانێن چُکّ مراوم هُداد کنبرزهیئے نماسگ، یکّے چه مکی مسیتئے کدیمی انتزاماتان اِنت که مهمود پد چه وتی پتئے وپاتا آییئے جاه نند بوتگ و اَلی اکبر هم برے وتی پتئے کمک کنگئے واستا شُتگ.

گۆن ۲۰۲۳ئے سالئے جم کُرتگێن هالان، کم چه کم ۱۹۲ جهمنندێن بلۆچ نامالومێن سلاهبندێن مردمانی تیرانی آماچ بوتگ‌اَنت که آیانی تها ۱۵۰ کس کُشگ بوتگ و ۴۲ کس ٹپّیگ بوتگ. اِشانی تها کم چه کم پنچ گونڈوێن چُکّ و چار جنێن هم هست‌اِنت.